Թաիլանդի մայրաքաղաք Բանգկոկում ավարտվել է ծանրամարտի աշխարհի պատանիների (մինչեւ 17 տարեկաններ) առաջնությունը, որտեղ Հայաստանը հանդես եկավ միայն տղաների պայքարում:
Բանգկոկում բացի մեդալներից խաղարկվում էին նաեւ 2018 թվականին Բուենոս Այրեսում կայանալիք պատանեկան ամառային օլիմպիական խաղերի ուղեգրեր:
Հավաքականի ավագ մարզիչ Էդուարդ Կիզողյանն «Առավոտի» հետ զրույցում ասել էր, որ իրենք մեկնում են առավելագույն՝ երկու, վարկանիշ նվաճելու նպատակով: Իսկ դրա համար անհրաժեշտ էր թիմային պայքարում տեղ զբաղեցնել յոթ լավագույնների մեջ:
Առավելագույն ծրագիրը մեր պատանի ծանրորդները կատարել չկարողացան: Վարկանիշային դասակարգման ցուցակում մեր թիմը 14-րդ տեղով արժանացավ Արգենտինայի միայն մեկ ուղեգրի եւ երկրորդը նվաճելու հնարավորություն այլեւս չունի: Դա միայն մի դեպքում է հնարավոր, որը, թերեւս, անհավանական է: Դա դոպինգ ստուգումն է:
Սակայն այստեղ խնդիրը ոչ միայն ու ոչ այնքան վարկանիշերի քանակն է, այլ պատանի ծանրորդների մրցելույթները եւ ցույց տված արդյունքները: Այս մասին երեկ հրավիրված մամուլի ասուլիսում ակնարկեց նաեւ ֆեդերացիայի գլխավոր քարտուղար եւ ազգային հավաքականի գլխավոր մարզիչ Փաշիկ Ալավերդյանը՝ նշելով, որ կատարվածը հասկանալու նպատակով պատվիրակության՝ Թաիլանդից վերադառնալուց հետո քննարկում կկազմակերպվի:
Բավական է ասել, որ աշխարհի առաջնությունում ութ մասնակիցների զբաղեցրած տեղերից լավագույն երեքն են 9-ը,10-ը եւ 11-ը:
Ինչեւէ, մենք պատանեկան օլիմպիական խաղերի ծանրամարտի մրցաշարում պատանի մեկ վարկանիշ ունենք: Մնում է սպասել աղջիկներին:
ԱՇՈՏ ՀԱԿՈԲՅԱՆ
«Առավոտ»
12,04.2017
