Հոգեկան առողջության խնդիրներ ունեցողների հարազատները դժգոհում են, որ առողջապահության նախարարությունը հիվանդներին տրամադրում է անորակ դեղորայք: Այսօր այս մասին «Հայացք» ակումբում ասացին հիվանդների հարազատներն ու «Հոգեկան առողջության վերականգնման հայկական ասոցիացիայի» նախագահ Կարինե Թուխիկյանը:
Տիկին Թուխիկյանի խոսքերով Հ/կ-ի 300 շահառուներին մարտի 13-ից տրամադրվում է «Օլանզապին» դեղը, որը, ինչպես նախարարությունից էին վստահեցրել, «հումանիտար խողովակով» է բերվել Հայաստան: Նշենք, որ հոգեկան առողջության խնդիրներ ունեցող այն անձինք, որոնք հաշվառված են պետության կողմից, նրանք բուժումն ու դեղորայքը պետպատվերով են ստանում: Նշված 300 շահառուները եւս պետպատվերով են ստացել իրենց հասանելիք դեղորայքը: Մինչ «Օլանզապինը», նրանց տրամադրվել է «Զիպրեքսա» դեղը, որն, ըստ շահառուների, շատ լավ ազդեցություն է թողել, եւ շատերն անգամ կենսունակ են դարձել, աշխատանք են գտել:
«Արտահիվանդանոցային ծառայություն բուժումը, «Զիպրեքսա» ծրագիրն այս տարի փետրվարից դադարեցվել է, եւ նշված դեղը փոխարինվել է «Օլանզապինով»: Թուխիկյանն ու հիվանդների հարազատները վստահեցրին, որ «Օլանզապին» ընդունելուց հետո, շատերը ոչ միայն բուժման արդյունք չեն ունեցել, նույնիսկ վատացել են:
Ըստ Թուխիկյանի՝ այս դեղորայքը, որը հումանիտար ճանապարհով է ներկրվել Հայաստան, արտադրվել է Հնդկաստանում, սակայն ընկերությունը գրանցված է Կանադայում: Տիկին Թուխիկյանը վստահեցրեց, որ իրենց հետաքննության արդյունքում պարզել են, որ 2015 թվականին այս «Օլանզապինի» ամբողջ խմբաքանակը վաճառքից հանվել է՝ ցածր արդյունավետության պատճառով. «Երբ փակվեց ծրագիրը, մարտի 21-ից հումանիտար խողովակով բերեցին Հայաստան, ժամկետի ավարտին մնացել է 2 ամիս, բայց նման դեպքերում ներկրվող դեղը պիտանիության նվազագույնը 6 ամսվա ժամկետ պետք է ունենա: Դեկտեմբերի 26-ին, երբ առողջապահության նախարարությանը նամակ գրեցինք, պատասխանեցին, որ ձեռք է բերվելու, մի օր հետո պատասխան ստացանք, որ արդեն ձեռք է բերվել: Ինչպես եղավ, որ մեկ օրում ձեռք բերվեց, ու ինչպես եղավ, որ խմբաքանակը հանվել է վաճառքից, ու արգելվել օգտագործել, բայց հայտնվել է Հայաստանում: Նախարարին՝Լեւոն Ալթունյանին երբ հարցրել ենք, թե ի՞նչ պիտի լինի այս 300 շահառուների վիճակը, մեզ պատասխանեց՝ այո, 300-ից պիտի տնտեսենք, որպեսզի 3000 -ին օգնենք»:
Կարդացեք նաև
Մանրամասն՝ տեսանյութում
Ասուլիսին ներկա Ռոզա Սարգսյանը, որի որդին հոգեկան առողջության խնդիր ունի, պատմեց, որ մինչ «Օլանզապինը» որդին «Զիպրեքսա» էր օգտագործում, իսկ հենց սկսեց «Օլանզապին» խմել, վիճակը, տիկնոջ խոսքերով՝ ահավոր է դարձել.«Զանգեցի բժիշկին, պատմեցի, ասաց՝ դե բերեք հիվանդանոց, բայց հիվանդանոցի վիճակն էլ էն չի՝ լավ-վատ, ծանր-միջին հիվանդները բոլորը մի տեղում են, սաղ խառնված իրար, ու տղաս ավելի վատ վիճակում հիվանդանոցից դուրս կգա»:
Մանրամասն՝ տեսանյութում
Տիկին Սարգսյանը նաեւ պատմեց, որ երբ նորից «Զիպրեքսայի» խմբաքանակը վերջացել էր, որդուն տեղական արտադրության դեղ էին նշանակել, որը կրկին չի օգնել:
Ասուլիսին ներկա Թամար Վարդանյանն էլ ասաց, որ այդ դեղորայքն ամուսինն է ընդունում, եւ կրկին անարդյունք.«Նախարարությունից պատասխանել են, որ «Օլանզապին» դեղով բուժվողների մոտ ցայտուն տարբերություն չկա «Զիպրեքսայի» համեմատ: Ցայտուն բառը խոսում է այն մասին, որ լավ էլ կա տարբերություն: Մենք չենք ուզում, որ խաղաղությունն ընտանիքում խաթարվի, էդ խարանի շղարշը պատռվի»:
Կարինե Թուխիկյանն ասաց, որ 2014 թվականին մշտադիտարկում է կատարվել 67 շահառուների շրջանում, 67-ից 62-ը «Զիպրեքսայի» մասին ասել են, որ ընդունելուց հետո լավ են զգում իրենց:
Բանախոսներն ասացին, որ իրենք ի վիճակի չեն իրենց միջոցներով դեղը ձեռք բերել, քանի որ այն թանկ է, իսկ ընտանիքներն էլ հիմնականում թոշակների ու նպաստների հաշվին են ապրում:
Ըստ բանախոսների, նախարարությունից վստահեցրել են, որ դեղորայքը թանկ է, եւ բյուջեն չի բավականացնում, նույնը վարչապետի օգնականն է ասել, իսկ Կարինե Թուխիկյանն էլ նկատեց. «Լավ, հասկացանք տնտեսելու քաղաքականությունն է, բայց ում հաշվին, հոգեկան հիվանդների՞ հաշվին»:
Մանրամասն՝ տեսանյութում
Aravot.am-ի հետ զրույցում «Զիպրեքսա» օգտագործող մի երիտասարդ կին, որը չցանկացավ, որ անուն-ազգանունը նշենք, քանի որ հազիվ աշխատանք է գտել, ու վախենում է այն կորցնել՝ եթե իմանան, որ հոգեկան առողջության խնդիր ունի, ասաց, որ հենց այս դեղի շնորհիվ է սկսել իրեն լավ զգալ: Այս կինը հիմա խնդրի առաջ է կանգնել՝ մտավախություն ունի, առողջական վիճակը էլի վատանա, ու ինքը նորից հասարակությունից մեկուսանա, աշխատանքը կորցնի. «Ես վերջապես իրենց վերագտել էի, կյանք մտել, աշխարհը տարբեր գույներով եմ տեսնում, հիմա, որ մտածում եմ կարող է էլի նախկին վիճակին լինեմ, չգիտեմ…»:
Նշենք, որ մեկ տուփ «Զիպրեքսան»՝ 10 մգ-ն, որի մեջ 28 դեղահաբ է, արժե մոտ 55 հազար դրամ: Իսկ շահառուների հարազատները պնդում են, որ այս դեղորայքով բուժումը 3-4 անգամ էժան կնստի պետության վրա, քան այլ դեղով բուժումը, քանի որ ապաքինվելու մասին խոսք չկա, դրան գումարած հիվանդանոցային ծախսերն ու նպաստը:
Aravot.am-ին առողջապահության նախարարությունից խնդրի առնչությամբ վստահեցրին, որ առաջիկայում պարզաբանում կտրամադրեն:
Նելլի ԲԱԲԱՅԱՆ
