Ռուս հաղորդավար Վլադիմիր Սոլովյովը, որն ապրիլի 7-ին այցելել էր Բաքու, «Վեստի FM» ռադիոկայանի եթերում նոր մանրամասներ է ներկայացրել Ադրբեջանի նախագահ Իլհամ Ալիևի հետ հանդիպումից:
«Ինձ վաղուց էին նախապատրաստում, որպեսզի Ադրբեջան գնամ: Ես հարցեր ունեի Ադրբեջանի նախագահին, քանի որ Հայաստանի հանդեպ իմ վերաբերմունքը շատ լավ հայտնի է և երբեք դա չեմ թաքցրել»,-ասել է հաղորդավարը:
Նրա խոսքով՝ Ալիևի հետ զրույցը տևել է շուրջ 2 ժամ՝ առանց տեսախցիկների:
«Նա ինձ վրա լավ տպավորություն թողեց: Հիանալի կրթված, խելացի պետական գործիչ է: Դա չի նշանակում, որ համաձայն եմ նրա դիրքորոշման հետ…»,-ասել է Սոլովյովը՝ շեշտելով, որ զրույցի ընթացքում Ալիևը վիրավորական ոչ մի արտահայտություն չի արել Հայաստանի իշխանությունների հանդեպ:
Կարդացեք նաև
«Նույն կերպ ես խոսել եմ նաև Հայաստանի նախագահի՝ Սերժ Սարգսյանի հետ: Յուրաքանչյուրն ունի կոշտ դիրքորոշում, սակայն նրանք չեն անցնում նրբանկատության սահմանները»,-հավելել է հաղորդավարը:
Սոլովյովի խոսքով՝ Ալիևի հետ հանդիպմանը քննարկվել է Լեռնային Ղարաբաղի 5 շրջանների հարցը, 2016թ. ապրիլին հակամարտության էսկալացիան:
Երբ ռուս հաղորդավարը հայտնել է իր տեսակետը, ըստ որի ղարաբաղյան հակամարտությունը ռազմական լուծում չունի, Ալիևն ասել է. «Զուտ ռազմական առումով ցանկացած խնդիր լուծելի է նույնիսկ Բաքվից: Մենք գնում ենք ոչ միայն ռուսական զենք: Արդեն գնել ենք 6 միլիարդ դոլարի իսրայելական զենքեր: Ժամանակակից տեխնիկայի շնորհիվ մենք տեսնում ենք՝ ինչ է տեղի ունենում Ղարաբաղում»:
Սոլովյովը նաև ասել է, որ ՌԴ-ի ներկայիս ղեկավարության օրոք արցախյան հակամարտության ռազմական լուծումը անհնարին է: «Փոխզիջման որոնումը հնարավոր է: Դա կհանգեցնի նրան, որ Հայաստանը դուրս կգա շրջափակումից: Հսկայական ներդրումներ կլինեն Ադրբեջանի կողմից: Կարևոր է նաև, որ Հայաստանը, Ադրբեջանը և Ռուսաստանը կգտնվեն ԵՏՄ-ի միասնական տարածքում»,-ընդգծել է Սոլովյովը:
Հաղորդավարի խոսքով՝ Ալիևն ափսոսանք է հայտնել, որ Սոլովյովի հաղորդումներում ազգությամբ հայ շատ խոսնակներ են լինում, բայց շատ քիչ ադրբեջանցիներ:
Սոլովյովը նաև նշել է, որ Ալիևն իրեն չի դատապարտել Արցախ այցելելու համար:
