Ապրիլի 11 -ին ՀՀ Սփյուռքի նախարարությունում տեղի ունեցավ մշակույթի նախարարության կազմակերպած ցուցադրական շտաբի մարզումը՝ «Կառավարման համակարգի բերումը բարձր աստիճանի» խորագրով: Այն ղեկավարեց մշակույթի նախարարի տեղակալ Արթուր Պողոսյանը:
«Հայաստանի նման փխրուն խաղաղություն ունեցող երկրում շատ կարևոր է, որ բոլոր գերատեսչությունները լինեն միավորված»,- նշեց Արթուր Պողոսյանը:
Ցուցադրական շտաբի մարզման ընթացքում խոսվեց հնարավոր պատերազմի ժամանակ իրականացվելիք գործողությունների մասին, որոնք պետք է կատարվեն ընդամենը մեկուկես ժամվա ընթացքում: Դրանցից են օրինակ՝ ՀՀ մշակութային արժեք ներկայացնող թանգարանային նմուշների տարհանումը և ապահով պահեստավորումը, պարային համույթների այցելությունները զորամասեր:
«Հնարավոր զորահավաքների ժամանակ առաջնագիծ կմեկնեն նաև գերատեսչությունների և ստորաբաժանումների ղեկավար անձինք» -հավելեց Արթուր Պողոսյանը:
Նունե ԱՍԼԱՆՅԱՆ
Լուսանկարները՝ ՀՀ մշակույթի նախարարության ֆեյսբուքյան էջից
