Ապրիլի 7-ին «Հենարան» մամուլի ակումբի հյուրերն էին 2001թ. «Միսս Հայաստան» Իրինա Թովմասյանն ու 2016թ. առաջին «Վիցե միսիս Եվրոպա» Աննա Դեմրիխանյանը:
Նրանք խոսեցին մեր օրերում գեղեցկուհու և մոր ընկալման մասին:
Իրինա Թովմասյանի համոզմամբ, մեր օրերում ավելի հեշտ է համատեղել կարիերան և ընտանիքը: «Առաջ եթե տանը չկար տատիկ, մի քիչ դժվար էր աշխատանքի համատեղումը: Հիմա շատ արագ կարող ես ամեն ինչ կազմակերպել և շատ շուտ մտնել առօրյայի մեջ: Աշխատանքն ու ընտանիքը օգնում են մեկը մյուսին»,-ասաց նա:
«Աշխատանքը, երեխան, այդ ակտիվ կյանքը իրար լրացնում են»,- համաձայնելով Իրինա Թովմասյանի հետ՝ նշեց Աննա Դեմրիխանյանը: Նա ասաց, որ շատ ուրախ ու երջանիկ է, որ իր աղջիկը իրենով հպարտանում է ու ավելացրեց նաև, որ եթե նա չվարեր այդպիսի ակտիվ կյանք, չաշխատեր, գուցե իր աղջիկն այդքան իրենով չհիանար, չհպարտանար ու չուզենար նմանվել իրեն:
Կարդացեք նաև
Իրինա Թովմասյանը նշեց, որ նկատել է, որ այժմ այն ընտանիքները, որոնք ապահովված են, ունենում են երեք, նույնիսկ ավելի երեխաներ, իսկ առաջ նախընտրում էին միայն մեկ կամ երկու երեխա ունենալ: «Երեք երեխա ունենալը կարծես դարձել է շատ սովորական երևույթ, շատ չեն զարմանում երեքի դեպքում: Ինձ շատ ուրախացնում է այդ փաստը», – հավելեց նա:
Անդրադառնալով աշխատող մայրերի թեմային, Իրինա Թովմասյանն ասաց, որ իհարկե պետք չէ անցնել սահմանը, պետք է այդ ամենից բացի երեխային նույնպես ժամանակ հատկացնել:
Իսկ թե ինչ է նշանակում մայր լինելը կնոջ համար, Իրինա Թովմասյանը պատասխանեց. «Երջանկություն: Դա երջանկություն է, որը որ ինձ մոտ եռակի է, անսահման է: Երեխայի հետ նույնիսկ դժվար պահերը պետք է վայելել»:
«Իհարկե բացի երջանկությունից նաև մեծ պատասխանատվություն է, դու մեծ պատասխանատվություն ես կրում և մեծ ներդրում պետք է ունենաս, ժամանակ հատկացնես, զբաղվես նրա հետ և լավ մարդ դաստիարակես»,- նկատեց Աննա Դեմրիխանյանը:
Անապահով ընտանիքներում բազմազավակության մասին խոսելով՝ Իրինա Թովմասյանը նշեց, որ չի հասկանում այն ծնողներին, ովքեր ունենում են այդքան շատ երեխա և հետո չեն կարողանում հոգալ նրանց կարիքները: Նրա կարծիքով կարելի է ունենալ երկուսը կամ երեքը և փորձել տալ հնարավորինը:
Աննա Դեմրիխանյանն էլ ասաց, որ դա իհարկե ամեն մարդու անձնական գործն է, բայց եթե երեխա են ունենում, պետք է պարտավորվեն այդ երեխային տալ լավագույնը:
«Պետք է ունենալ այնքան երեխա, որքանին որ հնարավոր կլինի լիարժեք ապահովել, որպեսզի երեխաները ոչնչի պակաս չզգան», – հավելեց նա:
Ռոզա ԾԱՂԻԿՅԱՆ
