Մայիսի 14-ին կայանալիք Երեւանի ավագանու ընտրությունների հիմնական ինտրիգը մնում է «Ծառուկյան» դաշինքի մասնակցության-չմասնակցության հարցը: Ավելի վաղ, դաշինքում «մարտական» էին տրամադրված, անգամ հայտնի էր, թե ո՞վ է գլխավորելու ցուցակը:
Ապրիլի 2-ին կայացած խորհրդարանական ընտրությունների ցուցակում չընդգրկվեց «Միասնություն» համազգային շարժման ղեկավար Արման Վարդանյանի անունը, որը դաշինքի ստեղծման գործում բավականին ակտիվ էր: Այն ժամանակ, հայտարարություն եղավ, որ Արման Վարդանյանը կգլխավորի դաշինքի`Երեւանի ավագանու ցուցակը:
Այժմ, սակայն, հնարավոր է, «Ծառուկյան» դաշինքը չմասնակցի Երեւանի ավագանու ընտրություններին: Համենայնդեպս, այդ լուրը տարածվեց երեկ երեկոյան: Մինչ այդ, դաշինքում հստակեցվում էին ցուցակի անդամները, խոսվում էր, որ հավանական է ցուցակն այլ մարդ գլխավորի:
Այս պահին, համենայնդեպս, հստակություն դեռ չկա: Aravot.am-ի հետ զրույցում Գագիկ Ծառուկյանի մամուլի խոսնակ եւ «Ծառուկյան» դաշինքով ընտրված պատգամավոր Իվետա Տոնոյանն ասաց, որ քննարկումները շարունակվում են:
Կարդացեք նաև
Քանի որ փաստաթղթերը ԿԸՀ ներկայացնելու վերջնաժամկետն ամսի 9-նն է, ենթադրվում է, որ այսօր երեկոյան կամ վաղը մինչեւ կեսօր, դաշինքում ավագանու ընտրություններին մասնակցել-չմասնակցելու հարցում որոշում կլինի:
Իվետա Տոնոյանը նաեւ ասաց. «Միակ հարցը, որն ավագանու ընտրությունների հետ կապված քննարկվել է «Ծառուկյան» դաշինքում, դա մեր քաղաքում առկա բազմաթիվ խնդիրների գույքագրումն ու դրանց լուծման գործնական ուղիների որոնումներն են: Գագիկ Ծառուկյանի գլխավորությամբ ամբողջ թիմն այսօր այս հարցերն են քննարկում և թեկնածուների հարց, որքանով ես տեղյակ եմ՝ ընդհանրապես դեռ չի քննարկվել և որևէ առաջարկ, որևէ մեկին չի արվել: Քանզի, ինչպես արդեն ասացի, առաջնահերթ է Երևան քաղաքում առկա բազմաթիվ խնդիրների գույքագրումն ու դրանց լուծման ճանապարհների նախանշումը»:
Հիշեցնենք, որ երեկ ՀՀԿ ԳՄ նիստում որոշվեց`ինչպես եւ ակնկալվում էր, իշխող ՀՀԿ-ի ցուցակը դարձյալ կգլխավորի գործող քաղաքապետ Տարն Մարգարյանը:
Նելլի ԳՐԻԳՈՐՅԱՆ
