«Եթե միասնական դաշինք ստեղծվի, որ միասնական ճակատով գնանք ու Երեւանն ազատագրենք, սկսենք Հայաստանի ազատագրումը Երեւանով, եթե այդպիսի մի բան արվի, թերեւս կմասնակցենք, եթե՝ չէ, մենք գյուղապետերի ընտրություններին այս փուլում չենք մասնակցում, երբ Հայաստանն ազատագրված չէ»,- Aravot.am-ին ասաց ԱԻՄ առաջնորդ Պարույր Հայրիկյանը՝ պատասխանելով հարցին՝ հնարավո՞ր է առաջիկա ավագանու ընտրություններին մասնակցեն:
Ըստ նրա, իրենք «գյուղապետերի ընտրությունը» սկզբունքային եւ կուսակցական մեծ գործ չեն համարում այս իրավիճակում. «Այս իրավիճակում խնդիր կա Հայաստանը դարձնել քաղաքացիներին պատկանող երկիր»:
Մեր հարցին՝ դաշինք կազմելու առաջարկի՞ եք սպասում, պարոն Հայրիկյանը պատասխանեց. «Մենք հնչեցրել ենք, դրան հետեւում է հասունացումն ու գիտակցումը: Խորհրդարանական ընտրություններից առաջ էլ մենք ասում էինք, առաջարկներ ներկայացնում ու առաջարկի սպասում, բայց իրենք իրենց ապուշի տեղ դրեցին՝ մեծամիտ, մեծամիտ ու, ի վերջո, ջախջախվեցին: Ջախջախված են բոլոր նրանք, որոնք 51 %-անոց թիմի մաս չեն, մնացածը լակոտություն է , եւ լակոտները դրանով թող ուրախանան»:
Հիշեցնենք, որ Երեւանի ավագանու ընտրությունները տեղի կունենան մայիսի 14-ին։ Մասնակցության հայտերի ներկայացման ժամկետը լրանում է ապրիլի 9-ին:
Կարդացեք նաև
Արփինե ՍԻՄՈՆՅԱՆ
