Տավուշի մարզի սահմանամերձ Ներքին Կարմիրաղբյուր գյուղի բնակիչ Վաչագան Մխիթարյանն այդ գյուղում առանձնատուն ունի, որը 1990-ական թվականներին ադրբեջանական զինուժի կողմից հրետակոծվել է, գտնվում է կիսակառույց,կիսավեր վիճակում: 2015թ. մարտից մինչեւ 2016թ. մարտի 24-ը Վ. Մխիթարյանն իր ընտանիքի անդամների հետ գտնվել է Ռուսաստանում:
2016թ. մարտի 24-ին նա ընտանիքով վերադառնալով գյուղ՝ տեսել է, որ առանձնատան երկրորդ հարկի ննջասենյակի փայտյա դուռը կիսով չափ բացված է: Ներս մտնելով, տեսել է, որ սենյակում առկա պահարանի հայելու վրա սեռական բնույթի հայհոյանքներ են գրված: Վ. Մխիթարյանը սկզբում մտածել է, որ տնից գողություն է կատարվել, զանգահարել է ոստիկանություն: Այնուհետեւ նա տանը շրջելով՝ պարզել է, որ բոլոր իրերն իրենց տեղում են, գողություն չի կատարվել:
Քննությամբ պարզվել է ,որ Վ. Մխիթարյանի առանձնատուն մտել է նրա հարեւան, Ներքին Կարմիրաղբյուրի բնակիչ, 1998թ. նոյեմբերին ծնված Հասմիկ Գալստյանը: Վերջինիս մեղադրանք է առաջադրվել ՀՀ քրեական օրենսգրքի 147 հոդվածի 1-ին մասով («Մարդու կամքին հակառակ նրա բնակարան ապօրինի մուտք գործելը»):
Ըստ «Դատալեքս» դատական տեղեկատվական համակարգի՝ դատարանում Հ. Գալստյանն առաջադրված մեղադրանքում իրեն մեղավոր է ճանաչել, ցուցմունք է տվել այն մասին, որ տեղյակ լինելով, Վ. Մխիթարյանի եւ նրա ընտանիքի անդամների արտերկրում գտնվելու մասին՝ իր ընկեր Նվեր Գինովյանին առաջարկել է գնալ Մխիթարյանի առանձնատուն՝ հաց ուտելու: Ճաշ ուտելուց հետո Հասմիկը բարձրացել է առանձնատան 2-րդ հարկ, բացել մուտքի դուռը եւ ննջասենյակի պահարանի հայելու վրա Վաչագան Մխիթարյանի կնոջ հասցեին վիրավորական բառեր գրել: Նա Վ. Մխիթարյանի կնոջից վիրավորված է եղել, քանի որ վերջինս իրեն կասկածել է իր ամուսնու հետ մտերիմ հարաբերություններ ունենալու մեջ:
Կարդացեք նաև
Դատարանը պատիժ նշանակելիս Հ. Գալստյանի պատասխանատվությունը եւ պատիժը մեղմացնող հանգամանք է համարել այն, որ նա հանցագործությունը կատարել է անչափահաս տարիքում,միայնակ մայր է, խնամքին ունի մանկահասակ երեխա, նախկինում արատավորված չի եղել, բնութագրվում է դրական, ընդունում է մեղքը, անկեղծորեն զղջում արարքի համար: 2017թ. մարտի 24-ին Բերդ քաղաքում Տավուշի մարզի առաջին ատյանի դատարանի դատավոր Զոյա Զաքինյանը վճռել է Հասմիկ Գալստյանին մեղավոր ճանաչել ՀՀ քրեական օրենսգրքի 147 հոդվածի 1-ին մասով եւ նրան դատապարտել 50 հազար դրամի չափով տուգանքի:
Ոսկան ՍԱՐԳՍՅԱՆ
