Աշխարհում մահացության յուրաքանչյուր տասներորդ դեպքը գրանցվում է ծխելու հետևանքով: Միևնույն ժամանակ այդ մահացությունների կեսից ավելին բաժին են ընկնում աշխարհի չորս երկրներին՝ Ռուսաստանին, ԱՄՆ-ին, Չինաստանին և Հնդկաստանին: Նման եզրահանգման են եկել Վաշինգտոն նահանգի համալսարանի մասնագետները: Հետազոտությունը հրապարակվել է The Lancet բժշկական ամսագրում: Այն հիմնված է «Հիվանդությունների գլոբալ բեռ 2015» զեկույցի վրա: Գիտնականները ուսումնասիրել են 195 երկրներում ծխելու մասին տվյալները:
Հետազոտության համաձայն՝ ծխողների թվով առաջատար են Ասիայի երկրները: Հայաստանում արական ներկայացուցիչների ավելի քան կեսը ծխող է հանդիսանում՝ փաստում են գիտնականները: Ամենաշատ ծխող երկրների եռյակում են Չինաստանը, Հնդկաստանն ու Ինդոնեզիան:
Ընդհանուր առմամբ մոլորակի վրա ծխողների թիվը հասել է 1 միլիարդի, և այսօր յուրաքանչյուր չորրորդ տղամարդ և յուրաքանչյուր քսաներորդ կին նիկոտինից կախվածություն ունի: Կանանց շրջանում աչքի են ընկնում Գրենլանդիան (44%) և Բալկանյան թերակղզու երկրները. Բուլղարիայում, Հունաստանում, Չեռնոգորիայում, Խորվաթիայում և Մակեդոնիայում ծխում է կանանց մոտ 25-28 տոկոսը։
