ՌԴ ԱԳՆ ներկայացուցիչ Մարիա Զախարովան ապրիլի 5-ին կայացած ճեպազրույցում հայտարարություն է արել Արցախում հակամարտության սրման տարելիցի կապակցությամբ:
«Այսօր լրանում է մեկ տարին, ինչ Մոսկվայում ԼՂ հակամարտության շփման գծում մարտական լայնածավալ գործողությունների դադարեցման մասին պայմանավորվածություն է ձեռք բերվել: Դա 1994թ. ի վեր ամենալուրջ խախտումն էր: ԵԱՀԿ Մինսկի խմբի համանախագահ երկրների, միջազգային կազմակերպությունների կողմից ձեռնարկվել են ակտիվ ջանքեր՝ ուղղված հակամարտության գոտում իրավիճակի կայունացմանը և խաղաղ գործընթացի համար պայմաններ ստեղծելուն: Մասնավորապես, այդ թեմային են նվիրված եղել Սանկտ Պետերբուրգում և Վիեննայում 2016թ. տեղի ունեցած գագաթնաժողովները՝ ԼՂ հակամարտության կարգավորման հարցով»,- ասել է Զախարովան:
ՌԴ ԱԳՆ-ի պաշտոնական ներկայացուցիչը նաև նշել է, որ հակամարտության կարգավորմանն ուղղված աշխատանքները շարունակվում են բոլոր ուղղություններով, և Ռուսաստանը հույս ունի, որ կողմերը բանակցային սեղանի շուրջ կվերադառնան և կվերսկսեն երկխոսությունը՝ հակամարտության կայուն կարգավորում ձեռք բերելու համար:
