Երևանի Մամուլի ակումբի նախագահ Բորիս Նավասարդյանը, Խոսքի ազատության պաշտպանության կոմիտեի նախագահ Աշոտ Մելիքյանը, մեդիափորձագետներ Սամվել Մարտիրոսյանն ու Գեղամ Վարդանյանը ապրիլի 2-ին «Մեդիա» կենտրոնում խոսեցին ընտրությունների լուսաբանումների մասին:
Բորիս Նավասարդյանը նշեց, որ 2012 թվականից հեռարձակվող ԶԼՄ-ները հանվել են ընտրողների վրա ազդելու զինանոցից, այդ միտումը շարունակվել է նաեւ այս տարի: Ըստ նրա, դա պայմանավորված է ընտրական օրենսգրքի առանձնահատկությամբ, ըստ որի, հեռուստաընկերությունները պարտավոր են հավասարակշիռ լուսաբանում ապահովել, անկախ նրանից որեւէ ուժ կամ թեկնածու անցկացնում է ակտիվ քարոզարշավ, թե՞ ոչ:
Աշոտ Մելիքյանը անդրադարձավ քարոզարշավի ընթացքում տեղ գտած իրավախախտումներին: Նա փաստեց, որ «Ազատություն» ռադիոկայանի թղթակցի հանդեպ Կոնդում բռնություն է կիրառվել, անգամ araratnews-ի թղթակցի մազերից են քաշել, եղել են եւս 5 խոչընդոտումներ: Նրա ձեւակերպմամբ, Էլեկտրիկ Երեւանի դեպքերից հետո մի տեսակ մերժողական վերաբերմունք կա ԶԼՄ-ների հանդեպ: Աշոտ Մելիքյանը նողկալի որակեց մթնոլորտը, նշելով, որ հասարակությունը դեգրադացված է, ինչը խանգարում է ԶԼՄ-ների մասնագիտական գործունեությանը:
Սամվել Մարտիրոսյանը խոսեց համացանցում քարոզչական նյութերը «կիսելուց», փաստեց, որ Ֆեյսբուքի գովազդի գինը վերջին օրերին երկու անգամ աճել էր: Մեդիափորձագետը նկատեց, որ լռության օրը չի պահպանվել ֆեյսբուքում, վճարովի գովազդը շարունակել է մնալ: Ինչ վերաբերում է Թվիթերին, Սամվելի Մարտիրոսյանի ասելով, մի շարք հայկական հաշիվներ արգելափակվել են: «Ես ենթադրում եմ, որ դա Հայաստանից չի արվել: Միշտ Ադրբեջանում այս օրերին փորձում են խլել մեր հեշթեգը, իրենք սկսում են մեր թեգերով իրենց նյութերը գրել: Երկու օր առաջ էլ թեմայի մեջ են մտել ռուսաստանցիներ կամ գուցե ուկրաինական հետք է, որ USIAD-ի կեղծ նամակն էին տարածել՝ իբր ԱՄՆ-ը փորձում է ազդել Հայաստանի ընտրությունների վրա»,- ասաց Սամվել Մարտիրոսյանը:
Կարդացեք նաև
Գեղամ Վարդանյանն անդրադարձավ ԶԼՄ-ների խմբագրական եւ եթերային քաղաքականությանը:
Գոհար ՀԱԿՈԲՅԱՆ
Լուսանկարը` «Մեդիա կենտրոն»-ի
