Ապրիլի 2-ը աուտիզմի իրազեկման համաշխարհային օրն է: Այն ընդունվել է 2008 թվականին ՄԱԿ-ի կողմից:
Sputnik Արմենիա մամուլի կենտրոնում խոսվեց նրա բուժման և բացահայտման մասին: Բանախոսներից Հասմիկ Մարգարյանը, ով «Աուտիզմ. Հաղթահարում» ՀԿ-ի նախագահն է և «Աուտիզմ» ազգային հիմնադրամի հոգաբարձուների խորհրդի անդամ, նշեց, որ ամբողջ ապրիլ ամսին աուտիզմի իրազեկմանը նվիրված միջոցառումներ և սեմինարներ են տեղի ունենում, տարբեր շենքեր լուսավորվում են կապույտ լույսով, որը հիշեցում է այս խնդրի մասին: Նա նաև ներկայացրեց վիճակագրություն. «ՄԱԿ-ի տվյալներով այսօր 68 երեխայից մեկը աուտիզմ ախտանիշը ունի, իսկ մի քանի տարի առաջ 100-ից ընդամենը մեկը: Այն աճել է մոտավորապես 13 տոկոսով»:
Աուտիզմը, որպես մանկական հիվանդություն իր տարածվածությամբ ավելի մեծ է քան շաքարային դիաբեթը, դեցեպենը, ուղեղային կաթվածը: Երեխային այս խնդիրը ուղեկցում է ամբողջ կյանքում:
«Աուտիզմ» ազգային հիմնադրամի բարեգործական հասարակական կազմակերպության դեռահասների մասնագիտական ծրագրերի համակարգող Ինեսսա Հարությունյանը ասաց, որ աուտիզմը դարձել է դարի խնդիր: «Դեռևս շատ վաղ տարիքում երեխան սկսում է կապ հաստատել ծնողների հետ, հենց այդ ժամանակ էլ արդեն ուշադիր ծնողը կարող է նկատել ախտանիշներ՝ կրկնողական շարժումներ, անտարբերություն շրջապատի նկատմամբ, վախվորածություն, խոսքի հետ խնդիրներ: Այլ է, երբ երեխայի հետ վաղ տարիքում ենք աշխատում, և այլ է դեռահասների մեծահասակների հետ աշխատանքը: Ինչքան վաղ տարիքում ենք սկսում աշխատանքը, այնքան արդյունքները դրական են»:
Կարդացեք նաև
Ներարգանդային շրջանում այս հիվանդությունը հնարավոր չէ բացահայտել: Նրանց աշխարհընկալումը տարբեր է, շատ հաճախ նրանք զգայական խնդիրներ են ունենում՝ այսինքն` կարող են գերզգայուն կամ հակառակը՝ թերզգայուն լինել:
Ինեսսա Հարությունյանը նշեց նաև, որ իրազեկման խնդիր կա մարզերում և արդեն քննարկման է դրված մարզերում նրանց մասնաճյուղերի բացումը:
Հայաստանում այսօր կա գրանցված, աուտիզմ ախտանիշ ունեցող 1000-ից ավելի երեխա:
Այս համախտանիշն են ունեցել Վոլֆգանգ Ամադեուս Մոցարտը, Բիլ Գեյթսը, Վինսենթ Վան Գոգը, Ալբերտ էյնշտեյնը:
Ջուլիետա ՄԿՐՏՉՅԱՆ
