«Օհանյան-Րաֆֆի-Օսկանյան» դաշինքն այսօր ամփոփեց քարոզարշավը: Դաշինքը գլխավորող Սեյրան Օհանյանը վստահեցրեց, որ իրենք հարաճուն ուժով առաջ են գնում: Րաֆֆի Հովհաննիսյանն ասաց, որ հնարավորություն ունեն եւ ակնկալում են, որ իշխող կուսակցությանն ուղարկելու են դեպի պարկեշտ ընդդիմության շարք:
Aravot.am-ի հարցին՝ քիչ առաջ հրապարակվեցին իսկական ամերիկյան «Գելափի» նոր հարցումները, ըստ որի, ՕՐՕ-ն հավաքելու է 4 տոկոս ձայն եւ Սեյրան Օհանյանին մարդիկ դրական են վերաբերվում ճիշտ այնքան, որքան Սերժ Սարգսյանին՝ 39 տոկոս, Րաֆֆի Հովհաննիսյանի վարկանիշը 36 տոկոս է, Վարդան Օսկանյանինը՝ 33 տոկոս, այսինքն՝ ավելի քիչ, քան Քոչարյանի ու Էդմոն Մարուքյանի վարկանիշն է, ինչպե՞ս կմեկնաբանեք դա:
Վարդան Օսկանյանը պատասխանեց բոլորի փոխարեն. «Դա հնարած կազմակերպություն է հենց նախագահականի կողմից՝ նրանց ֆինանսավորմամբ»: Նա ասաց, որ իրենք իրենց հարցումներն են արել եւ պարզել են, որ իրենք ծանրակշիռ տեղ են ունենալու խորհրդարանում, բայց տոկոսները չի կարող հրապարակել, քանի որ պայմանավորվածություն է եղել, որ դա փակ է լինելու:
Ավելի ուշ Րաֆֆի Հովհաննիսյանը հիշեցրեց, որ նախագահական ընտրություններում էլ հարցումները իրեն 5 տոկոս էին տալիս, բայց բոլորը տեսան՝ ինչ եղավ. «Իմ անձնական վարկանիշը շատ բարձր է՝ ի հաշիվ դաշինքի, կտեսնեք ինչ արդյունքներ են լինելու»:
Կարդացեք նաև
Լրագրողները հետաքրքրվեցին՝ դուք ձեր հարցումներով ասացիք, որ «Ծառուկյանն» է առաջին տեղում, դա նշանակում է, որ նա է որոշելու՝ ձեր հետ կոալիցիա կազմելու է, թե ոչ, դուք հանդիպել եք Ծառուկյանի հետ, ի՞նչ եք որոշել՝ Սեյրան Օհանյանը պատասխանեց. «Ես նաեւ նախկինում մի քանի անգամ հանդիպել եմ, մեր մոտ բարիդրացիական հարաբերություններ են եւ այդ հարաբերությունները պահպանվելու են»:
Հարցին՝ եթե ՀՀԿ-ն 50+1 տոկոս հավաքի, ի՞նչ հետընտրական զարգացումներ են սպասվում՝ Րաֆֆի Հովհաննիսյանը պատասխանեց, որ ժողովուրդը կհուշի, թե որքանով է ինքը հետեւողական՝ իր քվեն պաշտպանելու գործում:
Հռիփսիմե ՋԵԲԵՋՅԱՆ
