Բլոգեր Ալեքսանդր Ալիմովը travelblog.lv կայքում «Ճամփորդություն գոյություն չունեցող երկիր. Լեռնային Ղարաբաղ. մաս առաջին. Հայաստան» խորագրով ծավալուն հոդված է հրապարակել՝ անդրադառնալով Արցախ կատարած ուղևորությանը: Բլոգերը գրում է, որ նման ճամփորդության իրեն դրդել է մի քանի իրադարձություն:
«Առաջին հերթին իմ գործընկեր և ընկեր Ալեքսանդր Լապշինի աղմկահարույց գործը, որն այժմ ադրբեջանական բանտում է Լեռնային Ղարաբաղ այցելելուց հետո: Երկրորդ՝ ինձ հրավիրել էին բլոգերների ֆորումի, որը կազմակերպվել էր ԼՂ-ի մայրաքաղաքում՝ Ստեփանակերտում: Եվ այս վայրը այցելելու երրորդ պատճառը ճամփորդության հանդեպ իմ սերն է»,-գրել է բլոգերը՝ տրամադրելով հղում՝ ֆորումի մասին տեղեկություն ստանալու համար:
Ալիմովը գիտակցաբար չի անդրադարձել Ղարաբաղի և Ադրբեջանի միջև ռազմաքաղաքական պահերին: Նրա կարծիքով՝ ֆորումի հոլովակը լույս կսփռի նաև արցախյան հակամարտության և իրադարձությունների ժամանակագրության վրա:
«Ցանկանում եմ ուրիշ բանի մասին պատմել: Մարդկանց, տեսարժան վայրերի, հետաքրքրիր վայրերի, զբոսաշրջային օբյեկտների, ավանդույթների, հայկական հյուրասիրության և այն մասին՝ ինչով է այժմ ապրում Արցախը և այնտեղ բնակվողները: Ինչպես ինձ թվում է, Արցախի բնակիչները հոգնել են հակամարտության և պատերազմի թեմաներից: Եվ դա զարմանալի չէ՝ հաշվի առնելով այն փաստը, որ հակամարտությունը շարունակվում է շուրջ 30 տարի: Երկրի, չնայած չճանաչված, իշխանությունները մեծ ուշադրություն են դարձնում զբոսաշրջության զարգացման վրա»,-գրել է նա:
Կարդացեք նաև
Ալիմովը սկզբում ժամանել է Երևան, որտեղից էլ ուղևորվել է Արցախ: Նա հիացած է մայրաքաղաքի գեղեցկությամբ: Բլոգերը փաստում է, որ Երևանն աշխարհի հնագույն քաղաքներից մեկն է, որը 29 տարով մեծ է Հռոմից: Նրա աչքից, իհարկե, չի վրիպել նաև Արարատը, որը փաստացիորեն գտնվում է Թուրքիայում: «Բայց հենց այս լեռան պատկերով են կնիքում ձեր անձնագիրը, երբ ժամանում եք Հայաստան»,-գրել է Ալիմովը:
Նա մանրամասն նկարագրել է Երևանից Արցախ տանող ճանապարհը՝ անդրադառնալով տեսարժան վայրերին: «Այսպես ես հասա մինչև Արցախ, որն ավելի հայտնի է որպես Լեռնային Ղարաբաղ»,-գրել է բլոգերը՝ խոստանալով հաջորդ ռեպորտաժում մանրամասն պատմել Արցախի մայրաքաղաք Ստեփանակերտի մասին:
