Այսօր, «Մոսկվա» կինոթատրոնում վարչապետ Կարեն Կարապետյանի հետ հանդիպման էին եկել «գերակա շահ» հայտարարված տարածքների`Բյուզանդի, Արամի փողոցի բնակիչները, «Ֆիրդուսի» շուկա կոչվող տարածքի բնակիչները: Մի կին վարչապետին բողոքելով ասաց, որ ինքը նաեւ ՀՀԿ-ի շտաբի պետ է, հազիվ է հաջողել ժողովրդին համոզել, որ ընտրեն Գագիկ Բեգլարյանի եղբոր`ՀՀԿ վարկանիշային ցուցակով առաջադրված Հակոբ Բեգլարյանի օգտին:
«Մարդիկ եկել էին, ջղայնացած, գրգռված, ես անձամբ մի կերպ եմ հանգստացրել, ուղարկել եմ պարոն Սադոյանի մոտ»,- ասաց կինը`զուգահեռ գովելով Բեգլարյան եղբայրներին, ՀՀԿ-ին: Կնոջ խոսքից հետո, վարչապետը զարմացած հարցրեց. «Ես հիմա՞ պիտի պատասխան տամ»:
Կինը համաձայնեց`հետո պատասխան ստանալու տարբերակին: Իսկ այդ ընթացքում նախկին նախարար Գագիկ Բեգլարյանն իր թիկնապահին կանչեց եւ հանձնարարական տվեց:
Մանրամասները`տեսանյութում
Կարդացեք նաև
Մինչ այդ, Արամի փողոցի նախկին բնակիչ մի կին բողոքել էր, որ իրենք ութ-ինը տարի վարձով են ապրում: Նախկին վարչապետը փոխհատուցման գրաֆիկ էր սահմանել, ըստ որի, մինչեւ անցած տարվա դեկտեմբեր այդ մարդկանց գումարները պետք է փոխհատուցվեին: Բայց գրաֆիկը չկատարվեց, փոխհատուցման գումարն էլ 1000 դոլարին համարժեք գումարից իջեցվել է 620 դոլարի: Ավելին, հիմա իրենց տներ են առաջարկում Նորք-Մարաշում. «Ինչ-որ չոլի մեջ, ոչ դուռ կա, ոչ լուսամուտ, ոչ հոսանք, ոչ էլ գաջած ա»:
Վարչապետին հարցրեցին նաեւ Հյուսիս-Հարավ ավտոճանապարհի շինարարությունից, Իրան-Հայաստան ոռոգման ջրատարից, արագաչափերի արձանագրած խախտումների տուգանքներից:
Վերջին հարցին պատասխանեց արդարադատության նախարարը:
Հյուսիս-Հարավի մասին հարցին`վարչապետն ասաց, որ առայժմ նոր վարկ չեն նախատեսում վերցնել, տարբերակներ են քննարկում`պետություն-մասնավոր հնարավորություններով ավտոճանապարհի որոշ, առավել կարեւոր հատվածների շինարարությունն ավարտին հասցնեն: Իրան-Հայաստան ոռոգման համակարգը նա հնարավոր է համարում, բայց մինչ բանակցությունների ավարտը ձեռնպահ կմնա այդ մասին խոսել:
Նելլի ԳՐԻԳՈՐՅԱՆ
