Aravot.am-ը քաղաքագետ Գագիկ Համբարյանից հետաքրքրվեց, թե ԱԺ ընտրություններին մասնակցող 9 քաղաքական ուժերից ու նրանց վարկանիշային թեկնածուներից որո՞նք շանսեր ունեն առավելագույն ձայներ հավաքելու Շիրակի մարզում և կոնկրետ Գյումրիում։ «Իմ դիտարկմամբ, ՀՀԿ-ն մեծամասնություն չի ստանա Գյումրիում, սակայն գյուղական վայրերում ընտրությունների վերահսկողության միջոցով կկոմպենսացնի այն բացասական սալդոն ձայների առումով, որը կունենա Գյումրիում։ Կոնկրետ Գյումրիում կպարտվի ԲՀԿ-ին, սակայն գյուղական վայրերում հաղթանակի շնորհիվ՝ Հանրապետականը կհաղթի մարզի կտրվածքով։ Գյումրիում ընդդիմադիր կուսակցությունների մեջ չունենալով խարիզմատիկ վարկանիշային թեկնածուներ՝ ձայների մեծ մասը կրկին կգնան «Ծառուկյան դաշինքին»։ Ճիշտ է՝ նրանք կորուստներ կունենան ընտրազանգվածի պահով, գիտեք, որ նախկին ընտրություններում ԲՀԿ-ական թեկնածուներ կային, որոնք աշխատում էին և՛ իրենց, և՛ կուսակցությանը ձայներ բերելու։ Ընդդիմադիր ընտրազանգված ունեցող այս քաղաքում չկան համապատասխան ընդդիմադիր թեկնածուներ, դրա համար հաստատ համոզված եմ, որ հանրաճանաչ ընդդիմադիր կուսակցությունները Գյումրիում և Շիրակի մարզում շատ դաժան պարտություն կկրեն, ինչպես դա եղավ ՏԻՄ ընտրությունների ժամանակ։ Մեր ընդդիմադիր ուժերը գերադասեցին իրենց ողջ ռեսուրսները կենտրոնացնել հիմնականում Երևանում, Շիրակի մարզը կարելի է ասել նորաթուխ քաղաքական գործիչներով են ներկայացված, որոնք այս քարոզարշավի ընթացքում ոչ մի ակտիվությամբ աչքի չընկան»։
Քաղաքագետի կանխատեսմամբ, «Հայկական վերածնունդ» կուսակցությունը բավական ձայներ կտանի Շիրակի մարզում՝ շնորհիվ Հովհաննես Մարգարյանի ու Արթիկի տարածաշրջանը ներկայացնող թեկնածու՝ Մեղրաշենի գյուղապետ Հունան Պետրոսյանի։ Իսկ դաշնակցության ճակատագիրը, Գագիկ Համբարյանի բնութագրմամբ, կախված է Վարագյան եղբայրներից։
Գագիկ Համբարյանը առանձնացրել է այսպես ասած «ֆավորիտ թեկնածուների», որոնց մեջ և ընթանում է ընտրապայքարը. նրանք են՝ ՀՀԿ- վարկանիշային ցուցակից՝ Ֆելիքս Ցոլակյանը, Մարտուն Գրիգորյանը, Արման Սահակյանը, Մուշեղ Պետոյանը, «Ծառուկյան Դաշինքից» Վարդևան Գրիգորյանն ու Վարդան Ղուկասյանը, «Հայկական վերածնունդ» կուսակցությունից Հովհաննես Մարգարյանն ու Հունան Պետրոսյանը և ՀՅԴ-ից՝ Խաչատուր Վարագյանը։
Կարդացեք նաև
Մանրամասները՝ վաղվա տպագիր «Առավոտում»։
Նունե ԱՐԵՎՇԱՏՅԱՆ
