Աբովյանցի Սիրվան Թարմանյանը չի ցանկանում քննադատել իր գործընկեր մանկավարժներին, որոնք ՀՀԿ-ի եւ այդ կուսակցության վարկանիշային թեկնածուների համար ձայներ են հավաքում: Ասում է`ինքը նախկին մանկավարժ է, ինքը դրանից տեղյակ չէ:
Այդ առիթով ձայնագրությունները, հիշեցնենք, օրերս հրապարակել էր «Իրազեկ քաղաքացիների միավորում» հասարակական կազմակերպությունը:
«Մանկավարժները ստիպված են, նրանք չեն ուզում իրենց էդ փոքր աշխատանքը կորցնեն: Ինչ ասեն` նա էլ պիտի անեն»,- երեկ Աբովյան քաղաքում «Առավոտի» հետ զրույցում ասաց Սիրվան Թարմարյանը:
Հետաքրքրվեցինք`ո՞նց են վերաբերվում ՀՀԿ-ին, քանի որ ավանդաբար Կոտայքի մարզի բնակավայրերում ԲՀԿ-ի եւ Գագիկ Ծառուկյանի ազդեցությունն է մեծ եղել: Մեր զրուցակիցը չցանկացավ մանրամասնել, միայն ասաց`եւ Գագիկ Ծառուկյանն ազդեցություն ունի, եւ ՀՀԿ-ն, նույնիսկ ԵԼՔ-ն ու ՀՅԴ-ն որոշակի ընտրազանգված ունեն:
Կարդացեք նաև
«Կոտայքի մարզում Ծառուկյանը, որպես Ծառուկյան կա: Ինքը շատ է օգնում ժողովրդին, մարզիկներին առաջ է քաշում»,- ասաց նա`հավելելով, որ ամբողջ հանրապետությունում վիճակը ծանր է, լուծումներ են պետք:
Ինչ վերաբերվում է վարչապետին, նրա անձնական համակրանքին, ինչի վրա խաղադրույք է անում ՀՀԿ-ն, մեր զրուցակիցն ասաց, որ վարչապետին լավ է վերաբերվում, բայց նրա արած գործերը դեռ չի տեսել. «Հիմա հավատում ենք, խոսքերին ենք հավատում: Թող մի տարի-տարիուկես անցնի`տեսնենք ինչ գործ է անում: Թող անի, ապացուցի, որ հավատանք: Ասելն ուրիշ է, անելն ուրիշ է»:
Մանրամասները`տեսանյութում
Նելլի ԳՐԻԳՈՐՅԱՆ
