Այսօր կառավարության նիստը սկսվեց մոտ 15 րոպե ուշացումով: Վարչապետ Կարեն Կարապետյանն ուշացումով ներկայացավ նիստին: Մինչ օրակարգին անցնելը վարչապետը այս անգամ էլ մի շարք հանձնարարականներ տվեց:
Մասնավորապես վարչապետն անդրադարձավ սնանկության գործընթացներին եւ սնանկության կառավարիչների աշխատանքների անարդյունավետությանը: Վարչապետն ասաց, որ սնանկ ճանաչված բազմաթիվ ձեռնարկությունների աշխատակիցները բողոքում են կառավարիչների ոչ պատշաճ գործունեությունից, սնանկության գործընթացի չափազանց երկար տեւելուց, աշխատավարձերի ուշացումից եւ այլ խնդիրներից:
Կարապետյանն արդարադատության նախարարին հանձնարարեց եռամսյա ժամկետում կառավարություն ներկայացնել նշված խնդիրների վերացման, նաեւ սնանկության գործառույթների արդյունավետության բարձրացման առաջարկություններ: Վարչապետի խոսքերով՝ «Այստեղ, տիկի՛ն Հովհաննիսյան, ես նաեւ կխնդրեմ ձեզ, որպեսզի այս հանձնարարականը կատարելու ընթացքում կարողանանք բերել որոշակի կանխարգելիչ միջոցառումներ, սնանկության հասնելուց առաջ կարողանանք տիրապետել, որպեսզի այդ վիճակին չգանք, չհասնենք, որովհետեւ երբ հասնում ենք էդ վիճակին, դրա վրա ազդելու պրակտիկորեն հնարավորություն այլեւս չունենք»:
Արդարադատության նախարարը վարչապետին վստահեցրեց, որ նման մի մեխանիզմ փորձել են կիրառել, բայց հիմա էլ այլ գործիքակազմ հաշվի կառնեն, որպեսզի գործընթացը սահուն լինի:
Կարդացեք նաև
Նելլի ԲԱԲԱՅԱՆ
