2017թ. մարտի 13-ից Տավուշի մարզի առաջին ատյանի դատարանում ընթանում է Դավիթ Հակոբյանի դատավարությունը: Նա Դիլիջանի զինկոմ Հովհաննես Հակոբյանի որդին է: ՀՀ քննչական կոմիտեն 2017թ. փետրվարի 14-ին հաղորդագրություն է տարածել, որ Դիլիջան քաղաքի բնակիչներ Դավիթ Հակոբյանը եւ Սերգեյ Միքայելյանը 2016թ. փետրվարի 9-ին կենցաղային հարցերի շուրջ Դիլիջանում վիճաբանել են եւ պայմանավորվել հանդիպել փետրվարի 11-ին: Այդ օրը Ս.Միքայելյանն իր անձնական ավտոմեքենայով, որի ղեկին գտնվել է ընկերը, մի քանի անգամ գնացել է Դ.Հակոբյանի բնակության վայր՝ Շամախյան թաղամաս։
Հերթական այցը տեղի է ունեցել ժամը 22-ի սահմաններում, որտեղից վերադառնալիս Դ.Հակոբյանի կողմից կրակոցներ են արձակվել Ս.Միքայելյանի ավտոմեքենայի ուղղությամբ, որոնք դիպել են ավտոմեքենայի տարբեր մասերին։ Միջադեպի հետեւանքով Ս.Միքայելյանն ստացել է տարբեր վնասվածքներ: Ինքնաձիգ և մարտական փամփուշտներ են եղել նաեւ Ս.Միքայելյանի ավտոմեքենայում, ով իր ավտոմեքենայի ուղղությամբ արձակված կրակոցներից հետո ինքնաձիգից կրակոցներ է արձակել օդ՝ վախեցնելու նպատակով և դիմել փախուստի:
Դ.Հակոբյանին մեղադրանք է առաջադրվել ՀՀ քրեական օրենսգրքի 34-104-րդ հոդվածի 2-րդ մասի 6-րդ կետով և 235-րդ հոդվածի 1-ին մասով: Ս.Միքայելյանի կողմից ապօրինի զենք, ռազմամթերք ձեռք բերելու եւ պահելու համար նրան մեղադրանք է առաջադրվել ՀՀ քրեական օրենսգրքի 235-րդ հոդվածի 1-ին մասով: Դ. Հակոբյանը գտնվում է «Դատապարտյալների հիվանդանոց» քրեակատարողական հիմնարկում, Ս. Միքայելյանը՝ «Նուբարաշեն» ՔԿՀ-ում:
Ոսկան ՍԱՐԳՍՅԱՆ
