Արագածոտնի մարզի Թալինի ոստիկանության բաժնի պետ Արմեն Մելոյանն Aravot.am-ի տեղեկություններով, նախօրեին հավաքելով բաժնի աշխատակիցներին` հրահանգել է նրանց ապրիլի 2-ին քվեարկել Հանրապետական կուսակցության օգտին: Նա հստակեցրել է, որ ՀՀԿ ասելով նկատի ունի Արագածոտնի նախկին մարզպետի եղբորը` Նաիրի Սահակյանին: Վերջինս ՀՀԿ-ի տարածքային ցուցակով մարզում առաջադրված թեկնածուներից է:
Տեղեկացնենք, որ Արմեն Մելոյանը եւ Նաիրի Սահակյանը խնամիներ են: Տեղացիներն ասում են, որ Թալինում Արմեն Մելոյանը Նաիրի Սահակյանի փաստացի նախընտրական շտաբի պետն է: Ասում են, ոստիկանապետ իր ենթականերին հանձնարարել է նաեւ կամ բաց քվեարկություն կատարել, կամ լուսանկարել քվեաթերթիկը «ճիշտ» քվեարկության ապացույցը ներկայացնել իրեն: Չենթարկվողներին, նա սպառնացել է աշխատանքից ազատել:
Մեր աղբյուրների փոխանցմամբ, ոստիկանապետը նաեւ քարոզարշավին է ակտիվորեն մասնակցում, այցելում է պետական հիմնարկներ ու հորդորում է քվեարկել Նաիրի Սահակյանի օգտին, քանի որ վերջինս «դաբրո ստացած թեկնածուն է»: Ասում են նաեւ, որ ոստիկանապետը Թալինի քաղաքապետ Սարգիս Արամյանի հետ անձամբ է ճշտում եւ վերահսկում Նաիրի Սահակյանի օգտին քվեարկել պատրաստող քաղաքացիների ցուցակները:
Ոչ Արմեն Մելոյանից, որ Նաիրի Սահակյանից այս ամենի մասին մեկնաբանություններ ստանալ չհաջողվեց: Երկուսն էլ չեն արձագանքում հեռախոսազանգերին:
Կարդացեք նաև
Նելլի ԳՐԻԳՈՐՅԱՆ
