«Հայկական վերածնունդ»-ի ներկայացուցիչ Կարեն Թումանյանն այսօր «Տեսակետ» մամուլի ակումբում ասաց, որ կուսակցությունը կարեւորում է հաշմանդամություն ունեցողների կենսաթոշակների բարձրացման հարցը. «Մենք էլ ասում ենք` ժողովուրդ ջան միայն արագաչափերից ամսական 52 միլիոն դոլար գումար է գանձվում: Չի կարելի երկիրը պահել տուգանքների դաշտում: Այսօր մեր երկիրը տուգանքային մի յուրահատուկ ինստիտուցիոնալ համակարգ է, որտեղ շարքային քաղաքացին անընդհատ դատական ակտերի մեջ է»:
Ապրիլի 2-ին կայանալիք ընտրություններում իրենց կուսակցության հաղթանակի մասին խոսելիս` ասաց, որ դառնալու ենք այն ուժը, որն ազդեցություն է ունենալու խորհրդարանի որոշումներ ընդունելու վրա. «Այսինքն, մենք այնքան բավարար քվե ենք վերցնելու, որ առանց մեզ որոշումներ չընդունվեն»:
Մեկ այլ բանախոս էլ` «ԵԼՔ» դաշինքի պատգամավորության ներկայացուցիչ Համբարձում Համբարձումյանն էլ ասաց, որ ընտրություններից առաջ այնպիսի մթնոլորտ էր ձեւավորվել, որ թվում էր, թե այս հուսահատության մթնոլորտը հնարավոր չէ փոխել, բայց «ԵԼՔ» դաշինքին հաջողվեց պայքարել ընտրակաշառքների դեմ եւ ստեղծել են մթնոլորտը, որ հնարավոր է ընտրությունների միջոցով հասնել փոփոխության, իշխանափոխության;
«Շնից մազ պոկելու» տրամաբանությամբ առաջնորդված ընտրակաշառք վերցրած քաղաքացիներին էլ պարոն Համբարձումյանն ասաց, որ պետք է հասկանան, որ այդ տրամաբանությունը չի աշխատում, հետո այդ «շունը» սկսում է կաշի քերթել. «Եթե այդ հասկանան եւ խղճի մտոք ընտրություն կատարեն, ապա շատ բարձր եմ գնահատում «ԵԼՔ»-ի շանսերը: Կարծում եմ «Ելքը» հավակնում է իշխանություն ձեւավորել»:
Կարդացեք նաև
Անուշ ՄԱԹԵՎՈՍՅԱՆ
