Հունահռոմեական ըմբշամարտի Հայաստանի երիտասարդական առաջնությունը մասնակցության առումով այնքան էլ չի գոհացրել այդ տարիքային խմբի հավաքականի ավագ մարզիչ Արմեն Բաբալարյանին, որն այն որակել է միջին մակարդակի:
Նրա խոսքերով, հարյուր մասնակիցը նախորդ տարիների հետ համեմատած քիչ է, սակայն առաջնության արդյունքներով պետք է ձեւավորել հավաքականի կազմը եւ նախապատրաստվել ընթացիկ մրցաշրջանի ուսումնամարզական հավաքներին ու մրցաշարերին: Մասնավորապես, ապրիլ ամսին 20-25 երիտասարդների մասնակցությամբ, որոնց մեջ կլինեն նաեւ պատանեկան տարիքային խմբից նոր տեղափոխված մի քանի խոստումնալից ըմբիշներ, համատեղ ուսումնամարզական հավաք է անցկացվելու Իրանի երիտասարդական հավաքականի հետ, որից հետո մրցափորձ ձեռք բերելու նպատակով իր սաները Ղազախստանում եւ Վրաստանում հանդես են գալու միջազգային մրցաշարերում: Մասնագետն այդ ընթացքում նպատակ ունի օգնականների հետ միասին ի հայտ բերել ըմբիշների թույլ կողմերը եւ դրանք վերացնելով՝ նրանց պատրաստել Եվրոպայի առաջնությանը:
Աշոտ ՀԱԿՈԲՅԱՆ
Լուսանկարը՝ wrestling.am-ի
