«Կոնգրես-ՀԺԿ» դաշինքի նախընտրական հանդիպումներն այսօր շարունակվեցին Եղեգնաձորում, որտեղ եւս դաշինքի թեկնածուները կարեւորեցին Արցախյան հակամարտության լուծման փոխզիջումային տարբերակին գնալու անհրաժեշտությունը: «Բաքուն գրավե՞նք. չե՜ն թողնի…Գան Երեւանը գրավե՞ն. էլի չեն թողնում…Նշանակում է՝ մի օր վերջապես պետք է կանգ առնե՞նք, թե ոչ»,-դիմելով եղեգնաձորցիներին՝ ասաց դաշինքի պատգամավորի թեկնածուներից Արտաշես Գալստյանը:
«Պետք է Ադրբեջանի եւ հայկական կողմի ժողովուրդները շարժում ծավալեն հանուն խաղաղության, քանի որ երկու կողմն էլ պատերազմ չի ուզում: Մեր ժողովուրդը պետք է պարտադրի իշխանություններին՝ գնալ Ադրբեջանի հետ խաղաղության պայմանագրի կնքմանը»,-ասաց նա:
Դաշինքի մեկ այլ թեկնածու Ավետիկ Ավետիսյանն էլ իր հերթին նշեց, որ դեռեւս քսան տարի առաջ կարելի էր իրականացնել Լեւոն Տեր-Պետրոսյանի առաջարկած՝ հակամարտության լուծման փոխզիջումային տարբերակը, մինչդեռ «սեւ ուժերը» խոչընդոտեցին:
Կարդացեք նաև
Թեկնածուներից Աշոտ Սարգսյանն էլ շարունակելով՝ ասաց, որ 1997թ.-ին, երբ ՀՀ առաջին նախագահն առաջարկում էր այդ տարբերակը, նրա թիմի մի շարք բարձր պաշտոնյաներ, որոնք այսօր իշխանության գլխում են, ասացին, որ համաձայն չեն. «Եթե այն ժամանակ խաղաղության հարցը լուծվեր, այսօր կունենայինք չորս միլիոնանոց Ղարաբաղ»:
Թեկնածուներից տնտեսագետ Վահագն Խաչատրյանը համոզմունք հայտնեց, որ իշխանությունն իրեն սպառել է. «Եթե այդպես չլիներ, գոնե տնտեսական աճ կունենայինք, որը մենք մեր վրա կզգայինք: Բնակչության 90 տոկոսը դա իր վրա չի զգում»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
