«Հելսինկյան քաղաքացիական ասամբլեայի Վանաձորի գրասենյակ»-ը դիմել էր Կենտրոնական ընտրական հանձնաժողով, հայտնելով, որ մարտի 18-ին վարչապետ Կարեն Կարապետյանը աշխատանքային ժամերին նախընտրական հանդիպում է ունեցել Դիլիջան քաղաքում` օգտագործելով պետական ռեսուրսները, այսինքն` վարչապետին ուղեկցել են պետության կողմից տրամադրված ծառայողական մեքենաները, ինչը դիմումատուի համոզմամբ` Ընտրական օրենսգրքի խախտում է: Այսօր ԿԸՀ-ում այս հարցը քննարկման էր դրվել:
Տիգրան Մուկուչյանն ասաց, որ վարչապետի գործողությունները իրավաչափ են, քանի որ վարչապետին իր կարգավիճակից ու անվտանգությունից ելնելով տրամադրվում է պետական պահպանություն, ինչը նրան տրամադրվում է օրենքով սահմանված կարգով եւ օրենքով էլ սահմանվում է երբ, որտեղ, ինչ պայմաններում պաշտպանվող անձը կարող է օգտվել այդ ծառայությունից:
«Հելսինկյան քաղաքացիական ասամբլեայի Վանաձորի գրասենյակ»-ը ԿԸՀ-ին ներկայացրած մեկ այլ դիմումով էլ պահանջում էր վարչական վարույթ հարուցել, որով պատասխանատվության կենթարկվեն այն անձիք, որոնք փչացնում ու պատռում են կուսակցությունների, դաշինքների քարոզչապաստառները: Գրասենյակը օրով ժամով ու ամսաթվով ընտրական հանձնաժողովին էր ներկայացրել փաստեր, թե երբ որ կուսակցության պաստառներն են պատռվել ու ոչնչացվել, այդ թվում եւ ՀՀԿ-ի: Բոլոր այդ քարոզչապաստառները եղել են անվճար քարոզչական պաստառների համար նախատեսված վահանակների վրա:
Տիգրան Մուկուչյանն ասաց, որ պաստառները դիտավորյալ պոկելը, փչացնելը պատժվում է օրենքով նվազագույն աշխատավարձի 50-ապատիկից մինչեւ հարյուրապատիկի չափով: ԿԸՀ նախագահը նաեւ ասաց, որ նյութերը կուղարկվեն ոստիկանություն:
Կարդացեք նաև
Լուսինե ԲՈՒԴԱՂՅԱՆ
