Այսօր Կենտրոնական ընտրական հանձնաժողովում քննարկվեց նաեւ «Իրազեկ քաղաքացիների միավորում» խորհրդատվական հասարակական կազմակերպության դիմումը: Կազմակերպությունը փաստեր էր տրամադրել, որ ՀՀԿ-ն ուսանողների համար անվճար փոխադրումներ է կազմակերպում, ինչը Ընտրական օրենսգրքի խախտում է, քանի որ իրականացվում է քարոզարշավի շրջանակներում:
ԿԸՀ նախագահ Տիգրան Մուկուչյանը, սակայն առարկեց` նշելով, որ տրամադրված լուսանկարներում չի երեւում ժամանակը, թե իրադարձությունը երբ է տեղի ունեցել: Կազմակերպության ներկայացուցիչն ասաց, որ պատրաստակամ են թվային տարբերակով ներկայացնել, որտեղ Մուկուչյանի նշած ժամանակագրությունը պարզ երեւում է:
«Իսկ ի՞նչն է խանգարել, որ չեք ներկայացրել, քանի որ մենք ունենք ժամանակի խնդիր»,-արձագանքեց պարոն Մուկուչյանը:
Ապա ԿԸՀ նախագահն ասաց, որ ուսումնասիրել են եւ պարզել, որ ՀՀԿ-ն ուսանողներին անվճար տեղափոխել է մինչեւ մարտի 5-ը, այսինքն` քարոզարշավի մեկնարկը: Ասաց նաեւ, որ կուսակցությունից իրենց հայտնել են, որ եղել են առանձին դեպքեր, երբ թեկնածուն է իր նախաձեռնությամբ նման բան կազմակերպել, ինչն անմիջապես կանխվել է:
Լուսինե ԲՈՒԴԱՂՅԱՆ
