Մինսկը մտադիր չէ վիճել ո՛չ Ադրբեջանի, ո՛չ Հայաստանի հետ, այդ թվում՝ բլոգեր Ալեքսանդր Լապշինի արտահանձնման հարցով: Ինչպես հաղորդում է RIA Novosti գործակալությունը, այս մասին հայտարարել է Բելառուսի նախագահ Ալեքսանդր Լուկաշենկոն:
«Մենք (Բելառուսը և Հայաստանը-խմբ.) մտերիմ ժողովուրդներ ենք եղել, և շարունակում ենք մնալ: Ադրբեջանի հանդեպ Հայաստանը այլ վերաբերմունք ունի, բայց վերջինս ևս մեզ մտերիմ ժողովուրդ է… Ինչո՞ւ պետք է վիճենք Ադրբեջանի կամ Հայաստանի հետ: Հնարավոր է, որ մենք Ադրբեջանին և Հայաստանին երբևէ պետք գանք… Այդ պատճառով, ինչո՞ւ պետք է խառնվեմ, եթե ինձ չեն խնդրում… » ,-հայտարարել է Լուկաշենկոն Բելառուսում Հայաստանի դեսպան Արմեն Խաչատրյանի հետ հանդիպմանը:
Լուկաշենկոն անդրադարձել է նաև Լապշինի արտահանձնմանը Բաքվին:
«Հիշում եք Լապշինին: Ի՞նչ կապ ունի այստեղ Հայաստանը: Այո, Հայաստանն ինձ երբեք ոչինչ չի ասել Լապշինի մասին: Նրա հանդեպ հետախուզում էր հայտարարել միայն մի կողմը՝ Ադրբեջանը: Երբ նա այստեղ ձերբակալվեց, մտածում էի՝ ինչո՞ւ նրան այստեղ ձերբակալեցին: Թող գնար, ուր ցանկանում էր: Բայց ձերբակալեցին: Ինտերպոլը գիտեր: Մենք զեկուցեցինք, ինչպես պետք էր: Ո՞ւմ պետք է փոխանցեինք նրան: Նրան, ով հետախուզում էր հայտարարել»,-ասել է նախագահը:
Կարդացեք նաև
Լուկաշենկոն նաև նշել է, որ Լապշինը երեք երկրների քաղաքացիություն ունի, և այդ երկրներից ոչ մեկը հավակնություն չուներ նրա հանդեպ: «Ուստի, յուրաքանչյուր հարցում կան որոշակի ենթատեքստեր, և այս հարցը կհոլովվի այնպես, ինչպես ձեռնտու է ինչ-որ մեկին»,-եզրափակել է նա:
