Այսօր «Կոնգրես-ՀԺԿ» դաշինքը Վանաձորում հանդիպեց իր ընտրողների հետ: Արցախ պուրակում կայացած նախընտրական հանդիպման ժամանակ ՀԱԿ փոխնախագահ Արամ Մանուկյանը հայտարարեց, որ ժողովրդին դուր է գալիս խաբվածի կարգավիճակում լինել:
«Էն ուժերը, որոնք էսօր խորհրդարանում են, որոնք ամիսը մեկ իշխանություն են, մի ամիս հետո ընդդիմություն են, հետո էլի իշխանություն, դրանք իջել են ժողովրդի համար ընտրություն են անում, հզոր ամպեր, աստղեր, արեւներ իջեցնելով: Քաղաքացուն հաճախ հաճելի է լսել լավ բաներ՝ արբանյակներ դեպի տիեզերք, Մարս մարշուտկա կբացենք, Գալուստ Սահակյանն էլ էդ մարշուտկի տերը կլինի»:
ՀԱԿ փոխնախագահն ասում է, որ իշխանությունն ու մնացած բոլոր կուսակցությունները խաբում են ժողովրդին, հեքիաթներ պատմում. «Ժողովուրդ, տեսել եք, որ ձեր մոտ եկողները տիեզերքից աստղեր են իջեցնում: Ուրեմն, բոլոր կուսակցությունները մրցում են, թե ով ինչքան սուտ կասի… Մենք գտնվում ենք մի երկրում, որտեղ իշխանությունը մտել է յուրաքանչյուր քաղաքացու գրպանը, ասում ա 1000 դրամ տուր, որ էն զինվորը, որ քո երեխան ա, որին սահմանի վրա պահում են, հանկարծ վիրավորվի, էդ քո 1000 դրամով, ես նրա բուժման կամ նաեւ մահանալու դեպքում ծախսերը քաշեմ»:
Կարդացեք նաև
Արամ Մանուկյանն ասում է, որ իշխանությունը պետք է ձերբակալի կաշառք բաժանող կուսակցություններին: «Փող բաժանողն, ի՞նչ եք կարծում, իրա գրպանի փողն ա բաժանում, բարեգործություն է անու՞մ: Բարեգործությունը երբեք ցուցադրաբար չի լինում»:
-Մեզանից գողացած փողն են տալիս,-Արամ Մանուկյանի խոսքին արձագանքեց հավաքվածներից մեկը:
«Իշխանությունը, եթե իշխանություն լինի, մեկ րոպեում կձերբակալի բոլոր նրանց, ովքեր կաշառք են բաժանում, բոլոր կուսակցություններին: Կարող եք ասել, թե ինչու՞ չի ձերբակալում, որովհետեւ իրա դրած խաղալիքներն ու խամաճիկներն են»,-խոսքը շարունակեց Արամ Մանուկյանը:
-Ինքն իրեն ո՞նց ձերբակալի,- բարձրաձայնեցին հավաքվածները:
Տաթեւիկ ՂԱԶԱՐՅԱՆ
