Անցյալ տարվա ապրիլին Ադրբեջանի կողմից Լեռնային Ղարաբաղի հանդեպ սանձազերծած ռազմական գործողություններից հետո ԱՄՆ-ը մի քանի անգամ հստակ արտահայտեցին ԼՂ հակամարտության կարգավորման բանաձևը` «տարածքներ` կարգավիճակի դիմաց», որը համընկնում է Հայաստանի պաշտոնական դիրքորոշման հետ: Aravot.am-ը ԵԱՀԿ Մինսկի խմբի համանախագահ Ռիչարդ Հոգլանդից հետաքրքրվեց, թե կարո՞ղ է հաստատել, որ Սպիտակ Տան նոր վարչակազմի օրոք պաշտոնական Վաշինգթոնի նշյալ դիրքորոշումը պահպանվել է եւ արդյոք մյուս համանախագահող երկրները եւ առաջին հերթին Ռուսաստանը համակարծիք են ԱՄՆ-ի հետ այս հարցում:
Նա պատասխանեց. «Այո՛, մենք ունենք նոր նախագահական վարչակազմ Վաշինգթոնում, բայց վստահեցնում եմ, այս պահին մեր քաղաքականությունը նույն է մնում: Մենք ամբողջովին նվիրված ենք Մինսկի խմբին, համանախագահների գործընթացին, մենք ամբողջովին նվիրված ենք բոլոր կողմերի հետ հանգիստ աշխատելուն՝ գտնելու համար լուծում, որը կտանի խաղաղության»:
Ռիչարդ Հոգլանդը հավելեց, որ մյուս երկու համանախագահների հետ շատ սերտորեն է աշխատում. «Մենք ժամեր շարունակ նստում են խոսում ենք մանրամասների մասին: Կարող եմ ասել, որ մենք միասին ենք կանգնած, մեր միջեւ մեծ տարբերություններ չկան եւ նույնը վերաբերվում է մեր կառավարություններին: Եթե մեր կառավարությունները տարաձայնություններ ունենան այլ խնդիրների վերաբերյալ, սա այն խնդիրն է, որի շուրջ մենք չափազանց լավ ենք աշխատում, եւ ես շատ ուրախ եմ դրա համար»:
Կարդացեք նաև
Ամի ՉԻՉԱԿՅԱՆ