Մոսկվայի Տվերի դատարանը ընդդիմադիր քաղաքական գործիչ Նավալնիին տուգանել է 20 հազար ռուբլիով՝ Մոսկվայի կենտրոնում մարտի 26-ին չարտոնված ցույց կազմակերպելու համար:
Նավալնին գիշերն անցկացրել է ներքին գործերի բաժնում, իսկ ցերեկը նրան տեղափոխել են դատարան: Քաղաքական գործչի հանդեպ հարուցվել է երկու վարչական արձանագրություն՝ 20.2.2 (հասարակական վայրերում քաղաքացիների տեղաշարժի կազմակերպում և զանգվածային կուտակման կազմակերպում, որոնք հանգեցրել են հասարակական կարգի խախտմանը) և 19.3 (ոստիկանության աշխատակցի օրինական հրահանգների չկատարում ) հոդվածներով:
Առաջին հոդվածով դատարանը Նավալնիին տուգանել է 20 հազար ռուբլիով: Երկրորդ հոդվածի հարցով դատական նիստը դեռևս շարունակվում է, քաղաքական գործչին կալանավորելու սպառնալիքը պահպանվում է: Երկու հոդվածներով առավելագույն պատիժը 15-օրյա կալանքն է:
Հիշեցնենք, որ մարտի 26-ին Ռուսաստանի մի շարք շրջաններում, այդ թվում՝ մայրաքաղաք Մոսկվայում, չարտոնված ցույցեր են անցկացվել ընդդեմ կոռուպցիայի. Զանգվածային բողոքի ակցիայի ժամանակ ձերբակալվել են հարյուրավոր մարդիկ:
