«Մենք գործ չունենք 114 դպրոցի վատ տնօրենների հետ, մենք գործ չունենք 114 արջի ծառայություն մատուցողների հետ, մենք գործ ունենք համակարգի հետ, որը բուրգ է»,- այսօր «Հոդված 3» ակումբում ՀՀԿ-ի՝ վարչական ռեսուրսների չարաշահման եւ դպրոցի տնօրենների հայտնի ձայնագրությունների հետ կապված ասաց «Իրազեկ քաղաքացիների միավորում» ՀԿ ծրագրի համակարգող Դանիել Իոաննիսյանը:
Ըստ նրա, բուրգը կազմված է երեք շերտից՝ կենտրոնական իշխանություն, տարածքային իշխանություն եւ տնօրեններ: Տնօրենների մեծ մասը տվել են հստակ վարչական մարմինների անուններ:
Դանիել Իոաննիսյանն ասաց, որ իրենք հրապարակելու են այն չինովնիկների անունները, որոնք ցուցակների հավաքագրմամբ են զբաղվել: Նա ընդգծեց, որ իրենք 136 դպրոցների տնօրենների են զանգել, նրանցից 114-ն են ընդունել, որ զբաղված են ձայն հավաքելով. «Մենք չենք փորձել ընտրել այն տնօրեններին, որոնց մասին գիտենք, որ ՀՀԿ-ական են: Ընտրանքը պատահական է»: Ընդ որում, Իոաննիսյանն ասաց, որ մյուս տնօրենները, որոնք այսպես ասած չեն «ընկել թակարդը» եւ չեն խոստովանել, նրանից է, որ գլխի են ընկել, որ մի բան այն չէ, դրա համար չեն անկեղծացել:
ՀՀԿ-ն ասում է, որ աշխատանքային ժամից դուրս տնօրենները կարող են զբաղվել իրենց ուզած գործերով: Դանիել Իոաննիսյանի խոսքերով՝ «ՀՀԿ-ն մեզ մեղադրում է, որ ՀՀԿ-ին ենք թիրախավորել, բայց ներողություն, էլ ուրիշ ո՞վ ունի վարչական ռեսուրս: Վարչական ռեսուրս կարող է չարաշահել նա, ով ունի: Մեղադրանքը ընդունելի կլինի ինչ-որ տեղ, որ ասեն՝ մենք չենք ներգրավել ՀՅԴ-ի մասը: Դա մենք կընդունենք»:
Կարդացեք նաև
Կրթության փորձագետ Սերոբ Խաչատրյանը համաձայնեց Դանիել Իոաննիսյանի հետ, որ համակարգ է ստեղծվել, որը ներդրվել է կրթության ոլորտում. «Վերջին տարիներին Հունաստանի օրինակն է քննարկվել, որտեղ դպրոցների կուսակցականացում եղավ, ներքաշում ընտրությունների մեջ, որը բերեց ի վերջո տնտեսական կոլապսի: Ունենալով այս տխուր նախադեպը, մենք ցավոք, գնում ենք այդ տխուր ճանապարհով: Այսօր տնօրեններին չեն պարտադրում դառնալ ՀՀԿ-ական: Քանի որ համակարգը ներդրված է, մարդը գնում է ինքնակամ անդամագրվում է, որովհետեւ գիտի, որ իր դպրոցը դրանից կարող է տուժել, եթե չմտնի այդ կուսակցության մեջ, չի կարող դպրոցի վերանորոգման հարց բարձրացնել, օրինակ: Սա բերում է նրան, որ ազատամիտ մարդիկ, լուրջ կարողություններ ունեցող մարդիկ այլեւս չեն ուզենալու տնօրեն դառնալ: Սա բերելու է տնօրենների որակական նվազմանը: Որքանո՞վ է ճիշտ երեխային ուղարկել մի դպրոց, որոնց տնօրենները մասսայաբար կուսակցական են: Եթե մարդն անկուսակցական է, ուզում իր երեխան գնա մի դպրոց, որի տնօրենը լայնախոհ է, չունի քաղաքական նախընտրություններ, ո՞ւր ուղարկի նա իր երեխային: Մարդիկ հետաքրքրվում են՝ գոնե այնպիսին լինի՝ շատ թունդ կուսակցական չլինի»:
Դանիել Իոաննիսյանը արդեն գիտի, թե ինչ է սպասվում այս պատմությանը. Ի վերջո բերելու են նրան, որ ասելու են՝ վճռաբեկ դատարանի նախադեպային որոշմամբ՝ այս ձայնագրությունները չեն կարող ունենալ ապացուցողական նշանակություն դատարանում եւ դրանով հարցը կփակվի. «Ոստիկանությունն իրեն գցել էր դոդի բաղչեքը, ասում էր՝ տեղն ասեք, չկան, հիմա մենք տեղն ասում ենք կոնկրետ 114 տնօրենի եւ 56 չինովնիկների կոնկրետ անուն-ազգանուններով,՝ իրենց աշխատասենյակների գտնվելու վայրով: Գնացեք այդ մարդկանց աշխատասենյակներում խուզարկություն արեք, նրանց հեռախոսները դատարանի որոշմամբ գաղտնալսեք, հավաքեք ապացույցներ: Մենք դա ձեր տեղը հո չպե՞տք է անենք: Ձայնագրություն կա, որ տնօրենն ասում է՝ մարդկանց վերջին ձեւերով վախեցնում են: Արաբկիրում մանկապարտեզի տնօրենը պարզում է, որ մանկապարտեզում իր մոտ շտաբ է գործում ու ոչ մի իրավապահ ոտք չի դրել ոչ այս մանկապարտեզում, ոչ որեւէ դպրոցի տնօրենի մոտ»: Նա նշեց, որ 114 դպրոցներից 30-ի տնօրենները ընտրական հանձնաժողովների անդամներ են:
Հռիփսիմե ՋԵԲԵՋՅԱՆ
