Մարտի 26-ին Ռուսաստանի մի շարք շրջաններում, այդ թվում՝ մայրաքաղաք Մոսկվայում, չարտոնված ցույցեր են անցկացվել ընդդեմ կոռուպցիայի. զանգվածային բողոքի ակցիայի ժամանակ ձերբակալվել են հարյուրավոր մարդիկ:
Ավելի քան 500 մարդ ձերբակալվել է միայն Մոսկվայում: Նրանց թվում է նաև ընդդիմադիր գործիչ Ալեքսեյ Նավալնին:
Մայրաքաղաքում ձերբակալվածների թվում կան նաև անչափահասներ: Ձերբակալվածների մեծ մասի հանդեպ վարչական արձանագրություններ կկազմվեն: Նշվում է նաև, որ ձերբակալվել են մի քանի լրագրողներ, ընդ որում «Կոմերսանտ» թերթի թղթակից Սերգեյ Ռուսլովը երկու անգամ ոստիկաններին ցույց է տվել իր մամուլի քարտը, բայց նրան ևս ձերբակալել են: Բացի Ռուսլովից ձերբակալել են նաև etokavkaz.ru-ի լրագրողին:
Կրասնոդարում ձերբակալվածների թիվը գերազանցում է 100-ը, Մախաչկալայում՝ 150-ը: Տարբեր հաղորդագրությունների համաձայն՝ Պետերբուրգում ձերբակալվել է 30-50 մարդ: Այսպիսով, բողոքի ակցիայի ընթացքում ձերբակալությունները դարձել են ամենազանգվածայինը հետխորհրդային Ռուսաստանում:
Կարդացեք նաև
ԱՄՆ Պետդեպարտամենտը, դատապարտելով Ռուսաստանում հակակոռուպցիոն ցույցերի հարյուրավոր մասնակիցների ձերբակալությունը, դրանք որակել է որպես «անարգանք ժողովրդավարական արժեքների հանդեպ»։
«Մենք կոչ ենք անում ՌԴ-ի կառավարությանն անհապաղ ազատ արձակել բոլոր խաղաղ ցուցարարներին»,-հայտարարել է Պետդեպի պաշտոնական ներկայացուցիչ Մարկ Թոները՝ անհանգստություն հայտնելով Ալեքսեյ Նավալնիի ձերբակալության կապակցությամբ։
