Ֆուտբոլի Հայաստանի ազգային հավաքականը Վազգեն Սարգսյանի անվան «Հանրապետական» մարզադաշտում 2:0 հաշվով կարեւոր հաղթանակ տարավ Ղազախստանի նկատմամբ:
Հանդիպման 73-րդ րոպեին հաշիվը բացեց Հենրիխ Մխիթարյանը, իսկ երկու րոպե անց՝ 75-րդ րոպեին այն կրկնապատկեց Արաս Օզբիլիսը:
Խաղից հետո լրագրողների հետ հանդիպման ժամանակ մեր ընտրանու գլխավոր մարզիչ Արթուր Պետրոսյանը նախ տեղեկացրեց, որ արդեն 2-րդ րոպեին վնասվածք ստացած Գեւորգ Ղազարյանը տեղափոխվել է հիվանդանոց եւ հույս հայտնեց, որ վնասվածքը շատ լուրջ չի լինի:
Կարդացեք նաև
Մարզչի խոսքերով մեր հավաքականը առաջին խաղակեսում լավ խաղ ցուցադրեց, իսկ երկրորդի սկզբում մի փոքր կորցրեց խաղի թելը: «Կարմիր քարտը ճիշտ ժամանակին էր, որպեսզի վերագտնեինք մեր խաղը: Խաղային օղակներում փոխկապակցվածությունը լրացնելու համար ընկերական հանդիպումները կարեւոր նշանակություն ունեն: Սակայն այստեղ մենք կազմակերպական որոշ խնդիրների ենք բախվում, քանի որ հավաքականի հիմնական ֆուտբոլիստները խաղում են տարբեր ակումբներում եւ նրանց մեկտեղ հավաքելը դժվար է»,- ասաց Արթուր Պետրոսյանը:
Ղազախստանի հավաքականի գլխավոր մարզիչ Ալեքսանդր Բորոդյուկը չնայած պարտությանը, նույնպես գոհ էր իր ֆուտբոլիստների խաղից: Նրա կարծիքով մրցավարը կարող էր կարմիր քարտ ցույց չտալ իրենց պաշտպանին, քանի որ եվրոպական առաջնություններում նման դեպքերում ֆուտբոլիստին թույլատրում են շարունակել խաղալ: Նրա համոզմամբ, եթե իրենք 10 հոգով չմնային, հանդիպումը կարող էր միանգամայն այլ ընթացք ունենալ:
Աշոտ ՀԱԿՈԲՅԱՆ
