Երվանդ Քոչարի «Ալեգորիա» արձանն արդեն Մոսկովյան պուրակում է: Մարտի 25-ին տեղի ունեցավ արձանի բացումը` նոր վայրում: Հուշարձանը տեղափոխվեց, քանի որ ձևավորված պատմական միջավայրում նրա պահպանությունը դարձել էր անհնար:
Բացումը կատարեց Երվանդ Քոչարի որդին` Ռուբեն Քոչարը: Բացմանը ներկա էր Հայաստանի նկարիչների միության նախագահ Կարեն Աղամյանը: Նա շնորհավորեց երևանցիներին նման գեղեցիկ գոհար ունենալու համար: «Յուրաքանչյուր երկիր այցելելիս օտարերկրացին առաջին հերթին ուշադրություն է դարձնում այդ երկրի քաղաքներում տեղադրված մշակութային արժեքներին»,- ասաց նա:
Մշակույթի նախարար Արմեն Ամիրյանն ասաց, որ քաղաքի կառուցապատման պատճառով այն հայտնվել է մեզ համար ոչ տեսանելի վայրում: «Այսօր մեր նախաձեռնությամբ և «Վերականգնման կենտրոնի» ջանքերով արձանը վերանորոգվեց և տեղափոխվեց այստեղ»:
Կարդացեք նաև
Ճարտարապետների միության նախագահ Մկրտիչ Մինասյանը նույնպես ներկա էր բացմանը: Նա իր խոսքում նշեց. «Արվեստագետներ կան, որոնց յուրաքանչյուր թերթիկը, յուրաքանչյուր քանդակի մասը, որ արված է, պետք է մեծ հոգատարությամբ շրջապատված լինի: Շատ լավ է, որ այս քանդակը իր տեղը գտավ ուսանողական միջավայրում, որովհետև բոլորն էլ ունեն դրա կարիքը»:
«Երվանդ Քոչարը դեռ ապրում է, քանի որ ժամանակ առ ժամանակ իմաց է տալիս իր գործերով: Նրա ողջ հույսը ապագան էր, նա միշտ ասում էր, որ ժամանակից չի վախենում և ժամանակը իր ընկերն է, իր օգնականը»,- ասաց Ռուբեն Քոչարը:
Ջուլիետա ՄԿՐՏՉՅԱՆ
