Սյունիքի մարզպետ Վահե Հակոբյանից փորձեցինք ճշտել՝ որեւէ մեկին սովորեցրե՞լ է, որ Ծառուկյանին հարց տա: Ստորեւ ներկայացնում ենք մեր գրավոր հարցերին մարզպետի պատասխանները.
– Պարոն Հակոբյան, ինչպե՞ս եք գնահատում Գագիկ Ծառուկյանի այս պահվածքը, հայտարարությունը՝ ուղղված ձեզ:
-Չեմ պատրաստվում գնահատական տալ նախընտրական քարոզարշավին մասնակցող ուժերից ու գործիչներից որևէ մեկին, դա իմ ոճի մեջ չէ:
– Եթե ոչ, ապա ըստ ձեզ ինչո՞ւ է նա այդպիսի հայտարարություն անում:
Կարդացեք նաև
– Կրկնում եմ՝ չեմ պատրաստվում մեկնաբանել կամ գնահատականներ տալ որևէ մեկին:
–Կխնդրեի նաև արձագանքել կոնկրետ այն հայտարարությանը, թե դուք նոր եք եկել և մարդկանց կյանքից տեղյակ չեք:
-Հանգիստ եմ վերաբերվում նման հայտարարություններին: Ես մարզում բնակվել եմ և բոլոր խնդիրներին քաջատեղյակ եմ եղել մարզպետ նշանվելուց շատ առաջ: «Զանգեզուրի պղնձամոլիբդենային կոմբինատում» աշխատածս տարիներին եղել եմ նաև Կոմբինատի բարեգործական հիմնադրամի հոգաբարձուների խորհրդի նախագահը: Այդ տարիներից սկսած մինչ օրս իմ գործընկերների հետ համատեղ մարզի և առանձին համայնքների սոցիալ-տնտեսական խնդիրների լուծմանը միտված բազմաթիվ ծրագրեր ենք իրականացրել և շարունակում ենք իրականացնել: Մարզպետի պաշտոնը ստանձնելուց հետո Կոմբինատի աջակցությամբ հիմնեցինք «Սյունիքի զարգացման ու ներդրումների» հիմնադրամ, որի նպատակն է լուծել հենց այն խնդիրները, որոնց, իբր թե, ծանոթ չեմ: Օգտվելով առիթից նշեմ, որ մեր կողմից իրականացվում են մի շարք բարեփոխումներ մարզի գյուղատնտեսական, կրթական ոլորտների զարգացման ուղղությամբ:
Հիմնում ենք նոր արտադրամասեր, այգիներ, որոնք միտված են նվազեցնելու մարզում գործազրկության ցուցանիշը: Ուրախությամբ նշեմ, որ շոշափելի առաջընթաց ունենք, ինչը շատ ոգևորիչ է: Նաև աշխատանքներ ենք սկսել Կապանի օդանավակայանի վերագործարկման ուղղությամբ: Կարծում եմ, առավելագույնը մեկ տարուց օդանավակայանը կգործարկվի՝ նպաստելով զբոսաշրջության ու բիզնեսի զարգացմանը:
Սյուզաննա ՊՈՂՈՍՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
