Ալավերդիում նախընտրական հանդիպման ընթացքում ՀՀ նախկին արտգործնախարար, Օհանյան-Րաֆֆի- Օսկանյան դաշինքի 3-րդ հորիզոնականը զբաղեցնող Վարդան Օսկանյանը վստահեցրեց, թե իշխանությունները գիտակցում են, որ իրենք հեղինակություն չունեն. «Դրա մասին 2013-ի նախագահական ընտրությունների ընթացքում իմացան, երբ Րաֆֆի Հովհաննիսյանն ակնհայտորեն ժողովրդից աջակցություն ստացավ»: Ըստ Վարդան Օսկանյանի` այդ օրվանից իշխանությունները սկսեցին պատրաստվել հերթական ընտրություններին: Ըստ նախկին արտգործնախարարի` ՀՀ իշխանությունները սահմանադրություն փոխեցին իրենց վերարտադրության համար. «Սահմանադրություն փոխելու կարիք չկար, դրա անհրաժեշտությունը մեզ պարտադրվեց: Սահմանադրության փոփոխությունը կատարվել է իրենց վերարտադրությունն ապահովելու համար: Սրան գումարվեց այս խայտառակ Ընտրական օրենսգիրքը, ռեյտինգային համակարգը»:
Պարոն Օսկանյանը հորդորեց հենց այս գործիքներն օգտագործել հենց իշխանության դեմ և իշխանությանը դարձնել ընդդիմություն:
Վարդան Օսկանյանը հավաստիացրեց, որ իրենք իսկապես այլընտրանք են. «Մենք երբեք չենք տրվել ինքնահարստացման գայթակղությանը և երբեք կառչած չենք եղել մեր աթոռից: Երկու հատկանիշ, որ անհրաժեշտ է լավ կառավարման համար»:
Վարդան Օսկանյանը խոստացավ իրենց` իշխանության գալու դեպքում լրջագույն առաջընթաց ԼՂ հակամարտության կարգավորման հարցում: Նա հորդորեց առանց վախենալու վերցնել ընտրաթերթիկը և քվեարկել թիվ 8-ի համար:
Կարդացեք նաև
Օհանյան-Րաֆֆի-Օսկանյան դաշինքը գլխավորող Սեյրան Օհանյանի համոզմամբ` ապրիլյան խորհրդարանական ընտրությունները նախագահականից ավելի բարձր պատասխանատվության աստիճանի են: Պարոն Օհանյանը խոսեց երկրի զարգացմանը խոչընդոտող մի շարք խնդիրների մասին, մասնավորապես հայտնեց, թե չկան կառավարիչներ, որոնք երկիրն առաջ են տանում. «Տարիների ընթացքում դոփել ենք տեղում, և ընդհանուր հաշվով հետընթաց ապրել»:
Նա վստահեցրեց, թե չնայած որոշ ժամանակ իրենք էլ մաս են կազմել իշխանության, բայց տեսել են նաև այն ցավը, որ մեր ժողովուրդն է ապրում: Մեր մեջ չկան մարդիկ, որոնք իրենց բարեկամներով, մտերիմներով ու հարևաններով գրավել են իշխանական համակարգը, թալանում են: Ոչ մեկի մասին նման խոսք լսել չեք կարող:
Հանդիպման ավարտին ՕՐՕ դաշինքի համամասնական ցուցակում ընդգրկված Արմեն Մարտիրոսյանը կոչ արեց ՀՀԿ-ին ձայն չտալ, քանի որ այս պահին ՀՀԿ-ն անպայման պետք է ընդդիմություն դառնա, հակառակ դեպքում երկիր ենք կորցնելու:
Տաթև ՀԱՐՈՒԹՅՈՒՆՅԱՆ
