«Եթե նույնիսկ Սամվել Բաբայանը «Իգլա» է բերել, եթե նույնիսկ խոսացել է մեկի հետ, բարեհաջող ձայնագրել եք, ապա դա հիմք չէ, որովհետեւ ձեր իշխանությունը տմարդի մարդասպանին երկու օր հետո բաց է թողնում»,- այսօր «Հայելի» ակումբում ասաց ԱԱԾ պետի նախկին տեղակալ Գուրգեն Եղիազարյանը:
Նա դիմելով իշխանություններին՝ ասաց՝ «Դուք Վահան Շիրխանյանին «Հաց բերողի» օրն եք գցելու»: Նաեւ քննադատեց արդարադատության նախարարին՝ նրան անվանելով «սառցե դիցուհի»:
Ըստ Գուրգեն Եղիազարյանի, եթե զենքի մեկ միլիմետրանոց մաս էլ բացակայի՝ դա դեռ զենք չի, հետեւաբար «Իգլայի» խողովակ հայտնաբերելու դեպքում ձերբակալությունը անհասկանալի է. «Առաջին անգամ եմ տեսնում, որ օպերատիվ աշխատանքը համեմում են լրատվությամբ, մի օր առաջ նախապես ասում են՝ հեսա պիտի վերցնեն Սամվելին, պարզվում է՝ վերցնում են, «Իգլայի» պատմություն կա: Ժողովրդին դնում եք էշի տե՞ղ, էս ի՞նչ եք անում, իմ ազգի հերոսին՝ Սամվել Բաբայանի՞ն եք հետապնդում, կալանքը նախապես պատրաստո՞ւմ եք, ազգային հերոսի հետեւի՞ց եք ընկել»:
«Օհանյան-Րաֆֆի-Օսկանյան» դաշինքի անդամ Ազատ Արշակյանին դիտարկմամբ՝ շատ հնարավոր է, որ Սամվել Բաբայանն ուզում էր ապօրինի շրջանառությունից հանել այդ զենքը. «Շատ քչերը նրա կալիբրը ունեն: Զինվորական այդ կալիբրի հայ տղամարդիկ քիչ կան»: Նա ասաց, որ նախ Բաբայանը ասել է՝ «Իգլայի» հետ կապ չունեմ, բայց եթե բերել էլ է՝ շատ լավ է արել, ասել են ապօրինի կա, ասել է՝ բերեք, օրինականացնենք:
Կարդացեք նաև
Ըստ Ազատ Արշակյանի, իշխանությունները ջղաձգումների մեջ են եւ իրենց դաշինքին մեծ վնաս հասցրեցին՝ Սամվել Բաբայանին գծից հանելով:
Գուրգեն Եղիազարյանն ասաց, որ ինչ արեցին Հովիկ Աբրահամյանի գլխին, ինչ արեցին Գագիկ Ծառուկյանի գլխին, նույնը սարքելու են Կարեն Կարապետյանի գլխին:
Ազատ Արշակյանը հայտարարեց. «Կռվողներին հանում են , որ հող հանձնողները մնան: Մենք թույլ չենք տա Ղարաբաղը հանձնել, փոխզիջո՛ւմ»:
Հռիփսիմե ՋԵԲԵՋՅԱՆ
