«Հետընտրական զարգացումների հարց չի քննարկել, այդ թվում, նաև «Ծառուկյան» դաշինքի»,- այսօր ՀՀԿ ԳՄ նիստի ավարտից հետո, ի պատասխան լրագրողների հարցի`հնարավո՞ր է հետընտրական շրջանում ՀՀԿ-ն եւ «Ծառուկյան» դաշինքը կոալիցիա կազմեն, ասաց ԱԺ փոխնախագահ, ՀՀԿ խոսնակ Էդուարդ Շարմազանովը:
Առհասարակ, նա չի կարծում, որ «Ծառուկյան» դաշինքն արմատական ընդդիմություն է. «Շատ քաղաքացիներ, ինչու չէ, նաև դաշինքում ընդգրկված քաղաքական գործիչներ, որոնք այդքան էլ քիչ չեն, հենց իրենք «Ծառուկյան» դաշինքին ընդդիմադիր չեն համարում»:
Հնարավոր դաշինքների հարցը ՀՀԿ-ում կքննարկեն ապրիլի 2-ի ընտրությունների արդյունքներից հետո. «Ընտրություններից հետո մենք կֆիքսենք` ո՞ր ուժերն են իրավունք ձեռք բերել` ունենալ խմբակցություններ նոր խորհրդարանում, և կա՞ ուժ, որը կարող է միայնակ կազմել կառավարություն: Կոալիցիաները ինքնանպատակ չեն լինելու։ Դրանց հիմքը լինելու է ընդհանուր ծրագրային տեսլականը։ ՀՀԿ-ն առանց գաղափարական հիմքի որևէ ուժի հետ չի պատրաստվում կոալիցիաներ կազմել»:
Նելլի ԳՐԻԳՈՐՅԱՆ
