Այսօր «Հայացք» ակումբում քննարկվեց, թե ինչքանո՞վ է դատապարտելի Նաիրա Զոհրաբյանի հայտարարությունը, որ Սյունիքի մարզպետի ականջները կկտրեմ: Մենք բանախոսներից՝ ՀՎԿ թեկնածու Մարինե Քոչարյանից եւ «Ելք» դաշինքի անդամ Մանե Թանդիլյանից հետաքրքրվեցինք՝ երբեւէ իրենց մոտ ցանկություն չի՞ առաջացել ականջ կտրել կամ աչք հանել:
Մանե Թանդիլյանը նախ պատմեց, որ երբ քարոզչություն է իրականացրել թիվ 1 ընտրատարածքում, որտեղ ինքը ռեյտինգային թեկնածու է, շենքերից մեկից կարտոֆիլ են նետել իր վրա. «Պատկերացնո՞ւմ եք, երբ որ ես մեգաֆոնով խոսում եմ, իմ վրա կարտոֆիլ են նետում, ինչ ցանկություն կարող է առաջանալ: Բայց քաղաքական գործչի կերպարը, որը ես պատրաստվում եմ բերել, ես համարում եմ, որ քաղաքակիրթ եղանակով կարելի է միայն պատասխանել վայրենի եւ բարբարոս վերաբերմունքին, եւ դա է հենց այն սկզբունքը եւ համոզմունքը, որով ես գալիս եմ քաղաքական դաշտ: Ինձ շատ բաներ են անհանգստացնում մեր երկրում եւ նմանատիպ կեցվածքը, վարքն ու բարքը դրանցից մեկն է»:
Մարինե Քոչարյանն ասաց, որ համաձայն է՝ քաղաքական գործիչը պետք է լինի ավելի զսպված:
Լրագրողները հետաքրքրվեցին՝ Սամվել Բաբայանի ձերբակալության լուրն ինչպես կմեկնաբանեն՝ «Իգլա» հրթիռը ապօրինի ներկրելու մեղադրանքը տեղի՞ն է, թե՞ կազմակերպված է: Մանե Թանդիլյանը պատասխանեց, որ այս պահին վաղաժամ է խոսել, ուստի չպետք է շտապել որեւէ եզրակացություն անել:
Կարդացեք նաև
Մարինե Քոչարյանն էլ ասաց. «Ես Իգլայի պատմության մասին չունեմ դիրքորոշում: Մեր կուսակցությունը կարտահայտի իր դիրքորոշումը»: Մենք ճշտեցինք՝ համենայնդեպս, դուք նման զենք, զենիթա-հրթիռային համակարգ չե՞ք ներկրել՝ Մարինե Քոչարյանը պատասխանեց. «Չեմ ներկրել, չեմ տեսել, երբեք չեմ էլ լսել, բանակում չեմ ծառայել»:
Ավելի ուշ մենք Մանե Թանդիլյանից ճշտեցինք՝ իր վրա կարտոֆիլ նետելու տեսագրություն կա՞, պատրաստվո՞ւմ է դիմել իրավապահ մարմիններին: Նա նախ ասաց, որ դեպքը եղել է «Մասիվում» եւ նետել են շատ բարձր հարկից. «Հնարավոր չէր հետեւից գնալ, որովհետեւ ժամանակը շատ կարճ էր, եթե դադարեցնեինք քարոզարշավը եւ զբաղվեինք այդ հարցով: Մենք դրանով կզբաղվենք հետո: Նկարահանված կա, մեքենան է նկարահանել: Հետո իրավական քայլերի կդիմեմ, հասկանում եք, կարող է մարդը խնդիր ունի, որ բարձր խոսում ենք, քաղաքացի է, դա էլ կարող է լինի: Դրա համար նման բաները չեմ շահարկում, որովհետեւ կարող եմ նաեւ հասկանալ: Բայց եթե ես խորանամ ու նկատեմ, որ դա գնում է որեւէ մեկի շտաբ, իսկ ես դա կանեմ ընտրություններից հետո՝ համապատասխան պատասխան կստանա»:
Հռիփսիմե ՋԵԲԵՋՅԱՆ
