«Այս անգամ ընտրական այնպիսի տեխնոլոգիաներ են ներդրված, որ մենք բոլորս հավատում ենք իշխանափոխությանը երկու րոպեի ընթացքում»,- մարտի 23-ին Գեղարքունիքի մարզում քարոզարշավի ընթացքում ասաց «Ելք» դաշինքի անդամ Էդմոն Մարուքյանը:
Նա բացատրեց. «Ելք» դաշինքի թիվ 1 քվեաթերթիկը վերցնելով՝ մենք բոլորս կարող ենք իշխանափոխություն անել: Սա ամենակարեւոր ուղերձն է՝ հավատալ ձեր 1 քվեին, եւ ձեր 1 ձայնով քվեարկել»:
Էդմոն Մարուքյանը հայտարարեց, որ «Ելք» դաշինքը միակ քաղաքական ուժն է, որը ընտրվելու դեպքում իշխող Հանրապետականի հետ կոալիցիա չի կազմի: Նա բնակիչներին մի քանի տարբերակ առաջարկեց. «Ստացվում է՝ տարբերակ 1՝ կա՛մ ձայնդ փոշիացնում ես, տալիս ես այնպիսի ուժի, որը «բարիերը» չի հաղթահարի, կա՛մ ձայնդ տալիս ես մի ուժի՝ որպես ընդդիմություն եւ հետո ձայնդ գնում միանում է Հանրապետական կուսակցությանը՝ տարբերակ 2-րդ, կա՛մ ձայնդ տալիս ես «Ելք» դաշինքին եւ Հայաստանի Հանրապետությունում սկսվում են երկար սպասված բաղձալի փոփոխությունները: Այն մյուս տարբերակը, որ ձայնդ տալիս ես Հանրապետական կուսակցությանը, դա չեմ ասում»
Ամի ՉԻՉԱԿՅԱՆ
Կարդացեք նաև
