Մարտի 17-ին Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավոր Ա. Մկրտչյանը բավարարեց ՀՀ փաստաբանների պալատի անդամ, փաստաբան Գայանե Գրիգորյանի միջնորդությունը՝ Սերվենիկ Գեւորգյանին 1 միլիոն 500 հազար դրամ գրավի դիմաց անհապաղ ազատ արձակելով: Ըստ դատարանի պատճառաբանության, գրավի մուծումը կարող է երաշխիք հանդիսանալ Ս.Գեւորգյանի կողմից դատարան ներկայանալուց խուսափելու վտանգի հաճախականությունը չեզոքացնելուն եւ նրա իրավաչափ վարքագիծը կանխորոշելու հարցում:
Փաստաբանը ներկայացրել էր իր պաշտպանյալի առողջության հետ կապված պաշտոնական տեղեկանքներ, իսկ արդարադատության նախարարության «Դատապարտյալների հիվանդանոց» քրեակատարողական հիմնարկի կողմից տրված գրության համաձայն էլ, հաստատվել էր, որ Սերվենիկ Գեւորգյանը տառապում է հետեւյալ հիվանդություններով՝ «Արտերիալ տրանզիստոր հիպերտենզիա երկրորդ աստիճան կրիզային ընթացք, ռիսկի բարձր գործոն, տրանզիստոր իշեմիկ գրոհ, դիզոցիատիվ խանգարում ձախակողմյան պսեւդոհեմիպարեզով, գլխուղեղի արյան շրջանառության սուր խանգարումով, ձախակողմյան հեմիապարեզ իշեմիկ ինսուլտ ԱՄՈՒ զարկերակի ավազանում»:
Հիշեցնենք, որ անցյալ տարի փետրվարի 4-ին www.aravot.am-ում՝ «Անկողնուն գամված կին կալանավորը հացադուլ է հայտարարել», ինչպես նաեւ www.aravot.am-ում բարձրաձայնել էինք կալանավորի ուշագնացությանը, որն առիթ էր դարձել, որպեսզի նրան «Աբովյան» քրեակատարողական հիմնարկից տեղափոխեն «Սուրբ Գրիգոր Լուսավորիչ» բժշկական կենտրոնի վերակենդանացման բաժին: Կալանավորն այն ժամանակ էլ չէր կարողանում ինքնուրույն շարժվել, նստել, նրա ձախ կողմն անզգայացած էր, մշտապես պառկած վիճակում էր գտնվում: Փաստաբանը դիմել էր ՄԻՊ-ին, առողջապահության, արդարադատության նախարարներին, ՌԴ դեսպանին, որի քաղաքացին է համարվում Ս.Գեւորգյանը, բայց ապարդյուն:
ՌՈՒԶԱՆ ՄԻՆԱՍՅԱՆ
«Առավոտ»
22,03.2017
