Ազատամարտիկ, ՀԱԿ վարչության անդամ Վարդան Մալխասյանը չի կարծում, որ այսօր ձերբակալված Արցախի նախկին ՊՆ նախարար Սամվել Բաբայանը ՀՀ անվտանգությունը խաթարելու մտադրություն ունենար:
«ԱԱԾ-ն հիմա տոտալ գաղտնալսում է հեռախոսները, Սամվել Բաբայանը անհեռատես, էմոցիաներով ու կարճ հաշվարկներով առաջ գնացող մարդ չէ, որ նման բան անի, բացի այդ նման զինված ապստամբություն կատարող կատեգորիա էլ չկա Հայաստանում»,- կարծում է պարոն Մալխասյանը:
Հիշեցնենք, որ այսօր ԱԱԾ-ի տարածած հաղորդագրության համաձայն՝ մաքսանենգ եղանակով Հայաստանի Հանրապետություն «Իգլա» տեսակի զենիթա-հրթիռային համալիր տեղափոխելու փաստի առթիվ հարուցված քրեական գործի շրջանակներում այս պահին ձերբակալված են 3 անձ, այդ թվում՝ ՀՀ քաղաքացի Սամվել Բաբայանը։
Վարդան Մալխասյանը հիշեցրեց, որ տարիներ առաջ էլ նման բան իրենց գլխին էր եկել. «Մեզ ձեբակալեցին 2006 թվականին, ինձ, Ժիրայր Սեֆիլյանին, մոտ քառասուն հոգու տներ խուզարկեցին, մեկի տնից էլ հայտնաբերեցին ահռելի մեծ քանակությամբ զենք-զինաթերք՝ այդ թվում «իգլա», տարբեր ինքնաձիգներ. «Մի սենսացիա տարածվեց Հայաստանով մեկ, թե սրանք մի արսենալ են ունեցել, որ ուզենային մինչեւ Բաքու կգրավեին այդ զենքերով: Վերջում այդ ամեն ինչը փոզմիշ եղավ, այդ գործերն ուղարկվեցին մարդու իրավունքների եվրոպական դատարան, այնտեղ էլ մեզ արդարացրին: Պարզվեց, որ այդ ամենը շինծու փուչիկ է, որ այդ պահին պետք էր թատերական ներկայացում ստեղծել»:
Կարդացեք նաև
Մեր հարցին՝ կարծում եք, Սամվել Բաբայանը լուրջ վտա՞նգ էր ներկայացնում, որ շինծու գործ սարքեին, պարոն Մալխասյանը դժվարացավ պատասխանել, ասաց. «Ինքը նորանկախ պետության պատմության մեջ մեծ ներդրում ունի: Ես հիշում եմ, որ պատերազմի սկզբնական ժամանակահատվածում Սամվել Բաբայանին գերի վերցրին, ժամանակին ինքը բանտարկված էր Շուշիի բանտում: Նույնիսկ գումար հավաքեցինք, որ բանտից ազատեցինք: Երկրորդ անգամ էլ նա Շուշիի բանտում բանտարկվեց ԼՂՀ նախագահի նկատմամբ մահափորձ կատարելու մեղադրանքով: Հետո այդ մեղադրանքը անորոշ մնաց: Չեմ կարծում, որ նա մեր պետությանը վնաս հասցնող անձի նկարագիր ունի, նա հերոս է: Երկրի անկախության, անվտանգության մեջ մեծ ներդրումներ ունեցող անձը ո՞նց կարող է վնաս հասցնել»:
Արփինե ՍԻՄՈՆՅԱՆ
Աղջիկ ջան, “Մալխաս”-ի կողքի կանգնածն էլ է՞ դեպուտատության թեկնածու: Եթե “հա”`ասեք որ ցուցակով: Գնանք ազգովի ձայներս տանք նրանց: Իսկական հայ քաղաքական գործիչի վառ կերպար է: