«ԱԺ մոնիտորինգ» ծրագրի պատասխանատուներն այսօր ամփոփեցին հինգերորդ գումարման ԱԺ-ի գործունեությունը: Ծրագրի ղեկավար Լուսինե Վասիլյանն ասաց, որ այս գումարման խորհրդարանում ամենաշատը բացակայել են Գագիկ Ծառուկյանը, Վարդան Օսկանյանը, Աշոտ Աղաբաբյանը, Հրանտ Բագրատյանը: Ամենաշատը կողմ քվեարկել են ՀՀԿ-ականները՝ Ռազմիկ Զոհրաբյանը, Ռուբեն Հովսեփյանը, Հրանտ Գրիգորյանը:
Ամենաշատ ձեռնպահ քվեարկած պատգամավորներն են Աղվան Վարդանյանը, Արմեն Ռուստամյանը, Ալեքսանդր Արզումանյանը: Ամենաշատը դեմ քվեարկել են այս խորհրդարանում Նիկոլ Փաշինյանը, Ալեքսանդր Արզումանյանն ու Փոստանջյանը: Ի վերջո, ամենաակտիվ պատգամավորն է այս խորհրդարանում Միքայել Մելքումյանը, Խոսրով Հարությունյանը եւ Հովհաննես Մարգարյանը: Տասնյակի մեջ է նաեւ ՀԱԿ խմբակցության քարտուղար Արամ Մանուկյանը:
ԲՀԿ պատգամավոր Միքայել Մելքումյանն ասաց, որ շատ ուրախ է, որ ինքն ամենաակտիվն է եղել խորհրդարանում: Նա ասաց, որ երբ խոսում է 5 տարում «ծպտուն չհանած» պատգամավորների մասին, իրեն ասում են՝ ԱԺ-ն ԳԱԱ-ն չի. «Եթե հասարակությունում ներկայացված են գողականներ, անբաններ, այնտեղ էլ պետք է ներկայացված լինեն»:
Կարդացեք նաև
Արամ Մանուկյանը, խոսելով ցուցանիշների մասին՝ ասաց. «Սա խայտառակություն է, մենք պառլամենտ չենք ունեցել՝ 8 տոկոսանոց պառլամենտ է: Կոճակ են»:
Նա նկատի ուներ այն ցուցանիշը, որ ԱԺ-ի օրենքների գերակշիռ մեծամասնությունը հեղինակել է կառավարությունը:
Հռիփսիմե ՋԵԲԵՋՅԱՆ
