«Օհանյան-Րաֆֆի-Օսկանյան» դաշինքը մարտի 21-ին Արագածոտնի մարզի Թալին քաղաքում էր: Դաշինքի անդամ, պաշտպանության նախկին նախարար Սեյրան Օհանյանը թալինցիների հետ հանդիպման ընթացքում ասաց, որ ինքը ամեն ինչի հիմքում դնում է երկրի անվտանգությունը:
«Եթե այսօր ռազմական անվտանգությունը գտնվում է բարվոք վիճակում՝ մեր բոլոր ղեկավարների, մեր ծառայակից ընկերների, մեր մարտական ընկերների առօրյա չարքաշ ծառայության շնորհիվ մենք հասել ենք հաջողության, որ բանակը՝ որպես կայացած կառույց, այսօր ապահովում է մեր անվտանգությունը: Ապա կարող ենք ասել, որ անվտանգության այլ բաղադրիչների մեջ՝ տնտեսական, ժողովրդագրական, տեղեկատվական, գիտական, կրթական, առողջական, մենք բավականին մեծ թերություններ ունենք: Եվ այդ է ստիպել, որ ես, խորը վերլուծելով իրավիճակը, տեսնելով, թե ինչպիսի խաղի կանոններ կան Հայաստանում, ինչ մթնոլորտ է ձեւավորվել, որոշում եմ ընդունել մեր համակիրների, մեր գաղափարակից ընկերների հետ միասին քաղաքական այս կառույցը ձեւավորել եւ գնալ պետական կառավարման համակարգի փոփոխությունների»,- ասաց նա:
Սեյրան Օհանյանը նշեց, որ տարածաշրջանային իրավիճակը բավականին բարդ է, այն առումով, որ դեպի Հայաստան եկող սպառնալիքներն այնքան արագ են զարգանում, որ իրավունք չունեն դանդաղ տեմպերով որոշումներ ընդունել. «Տնտեսության ազատականացումը, մենաշնորհների դեմ պայքարը, կոռուպցիան, արդարության մթնոլորտի ձեւավորումը մեծ ռեսուրսներ չեն պահանջում: Անհրաժեշտ է քաղաքական կամք, վճռականություն, ամուր բռունցք, ամուր ձեռք, ինչը մենք պատրաստ ենք իրականացնել մեր անցած ճանապարհով, մեր փորձառությամբ»:
Ամի ՉԻՉԱԿՅԱՆ
