«Այսօր երկրի նախագահի պաշտոնը այնպիսին է դառնում, որ կարծում եմ, առանձնապես կարեւոր էլ չի լինելու, թե ով է ստանձնելու այդ պաշտոնը, որովհետեւ դա զուտ ներկայացուցչական պաշտոն է լինելու»,- այսօր «Հայացք» ակումբում հարցին՝ ո՞վ է լինելու ձեր նախագահի թեկնածուն՝ «Ծառուկյան» դաշինքի անդամ Արարատ Զուրաբյանն այսպես պատասխանեց: Իսկ թե ով կլինի վարչապետի թեկնածուն՝ նա ասաց, որ այս պահին չեն քննարկել, չի կարող ասել:
Նա ասաց, որ պարտադիր չէ, որ դաշինքը գլխավորողը լինի վարչապետի թեկնածուն կամ նախագահի թեկնածուն: Դա թիմը պետք է որոշի:
Արարատ Զուրաբյանը վստահեցրեց, որ «Ծառուկյան» դաշինքը հաղթելու է ընտրություններում: Լրագրողները հարցրեցին՝ այսքան ժամանակ է՝ քաղաքականությունում եք, ինչի՞ց եք ենթադրում, որ ՀՀԿ-ն այդքան հեշտությամբ կարող է ձեզ ու Գագիկ Ծառուկյանին զիջել իշխանությունը, 2008-ին, երբ ԲՀԿ-ի կարիքն այդքան չկար, էլի միացան, կոալիցիա կազմեցին, միասին շամպայն խմեցին, այս դեպքում այդ ի՞նչ կապանքներից եք ազատվել, որ վստահ ասում եք՝ Արարատ Զուրաբյանը պատասխանեց. «Հիշեցիք 2008-ը, հիշեք նաեւ 2012-ը, որը դրան հաջորդել է: Հիշեք, որ նույն Գագիկ Ծառուկյանն ուներ լուրջ առաջարկներ մաս կազմելու իշխանությանը եւ ձեւավորելու կոալիցիա, ստանալու բավականին մեծ փաթեթ իշխանության մասի եւ նա հրաժարվեց: Նա պայքարում է, որ ՀՀԿ-ն չվերարտադրվի»:
Ըստ Արարատ Զուրաբյանի, ՀՀԿ-ն այնքան էլ պարզ կառույց չէ, որ հեշտությամբ որեւէ մեկին իշխանություն զիջի, բայց չպետք է մոռանալ, որ այս աշխարհում այն ամենը, ինչ ունի սկիզբ, ունի նաեւ վերջ: Նա ասաց, որ եթե հասարակությունը չի հրճվում ՀՀԿ-ով, ուստի եթե ռեալ ընտրություններ լինեն, ՀՀԿ-ն կզիջի տեղը:
Կարդացեք նաև
Հռիփսիմե ՋԵԲԵՋՅԱՆ
