«Տարեկան 15.000 արտասահմանցի զբոսաշրջիկ, տասնյակ հազարավոր ՀՀ բնակիչներ, 44 հյուրանոցային համալիրներ, ՀՆԱ 3 տոկոս, 1281 դիտարժան վայրեր, 7 տուրիստական ընկերություններ: Առավելագույն թվով զբոսաշրջիկներ ՌԴ-ից, ԱՄՆ-ից, Իրանից և Եվրոպայից»,- Արցախի զբոսաշրջության ոլորտն այսպես ներկայացրեց ԼՂՀ էկոնոմիկայի նախարարի տեղակալ Սերգեյ Շահվերդյանը Ստեփանակերտում անցկացվող բլոգերների միջազգային ֆորումի ընթացքում:
Ստեփանակերտ ժամանած շուրջ 30 արտասահմանցի լրագրողներին հետաքրքրում էին Ստեփանակերտի օդանավակայանի գործարկմանը, Ադրբեջանի «սև ցուցակին» Ղարաբաղ բրենդի ռեբրենդին վերաբերող հարցեր:
«Սև ցուցակին» վերաբերող հարցին պարոն Շահվերդյանը պատասխանեց. «Դա ևս Ադրբեջանի կողմից փորձ է վախեցնել հանրությանը և հետ պահել Արցախ այցելությունից: Լապշինի գործ էլ էր դրա համար հորինված: Այսինքն՝ ամեն կերպ Ադրբեջանը փորձում է խոչընդոտներ ստեղծել Արցախի տուրիզմի զարգացման համար»:
Ստեփանակերտի օդանավակայանի գործարկման հարցի առնչությամբ ԼՂՀ էկոնոմիկայի նախարարի տեղակալն ասաց. «Օդանավակայանը չի աշխատում ոչ թե նրա համար, որ Ադրբեջանի կողմից կա ճնշում, այլ որ միջազգային հանրությունն է ճնշում գործադրում: Իսկ թե երբ կարող է այդ հարցը լուծվել, ոչ ոք պատասխանել չի կարող»:
Կարդացեք նաև
Պարոն Շահվերդյանն ասաց, որ փոխարենը կառուցվել է ԼՂՀ-ն ՀՀ-ի հետ կապող երկրորդ ճանապարհը:
Ղարաբաղ բրենդի ռեբրենդինգի հետ կապված Սերգեյ Շահվերդյանն ասաց, որ այս հարցում ժամանակ ու զգուշավորություն է պետք. «Ղարաբաղ բրենդն ավելի ճանաչելի և ընդունելի է արտասահմանցիների կողմից: Նախ` մենք քայլեր պետք է ձեռնարկենք, որ Արցախ և Ղարաբաղ անվանումները դառնան համարժեք, հետո ռեբրենդինգի արդյունքում Ղարաբաղը փոխարինենք Արցախով: Այժմ տուրիզմի ոլորտում դեռ կշարունակի մնալ Ղարաբաղ բրենդը»:
Տաթև ՀԱՐՈՒԹՅՈՒՆՅԱՆ
