«Վարդան Օսկանյանը, Սեյրան Օհանյանը եւ Րաֆֆի Հովհաննիսյանը կայացած մարդիկ են: Ինձ համար ցանկացած անձ, որը իշխանության ժամանակ կառավարել է, արդեն իսկ սխալական է, բայց սխալական ենք բոլորս: Միաժամանակ, իրենց գործունեությունն իշխանության տարիներին դրական է եղել»,-«Օհանյան-Րաֆֆի-Օսկանյան» դաշինքի՝ Աջափնյակ վարչական շրջանում այսօր նախընտրական հավաքի ժամանակ հայտարարեց դաշինքի թեկնածու, «Ժառանգություն» կուսակցության փոխնախագահ Արմեն Մարտիրոսյանը:
«Սեյրան Օհանյանը մինչեւ մի քանի ամիս առաջ ազգային հերոս էր, եթե իշխանությունների սեւ PR-ը չլիներ: Ազգային հերոս էր, որովհետեւ բոլորս՝ թե իշխանությունը, թե ընդդիմությունը, ընդունում էինք՝ բանակը միակ կայացած կառույցն է: Եթե անհրաժեշտ էր լինում, մենք հենվում էինք բանակի վրա»,-համոզմունք հայտնեց Արմեն Մարտիրոսյանը:
Անդրադառնալով դաշինքի մյուս առաջնորդին՝ Վարդան Օսկանյանին, նա ասաց. «Նրան ես էլ եմ քննադատվել, բայց չեմ կարող չընդունել, որ նա բարձր կարգի դիվանագետ է, լավ բանակցող: Նրա ժամանակ ՀՀ-ի դեմ բանաձեւեր չեն ընդունվել»:
Րաֆֆի Հովհաննիսյանն էլ, Մարտիրոսյանի խոսքով, Օսկանյանի նման հրաշալի կրթություն է ստացել. «Երկուսն էլ դիվանագետի հրաշալի կարիերա կարող էին ունենալ ԱՄՆ-ում, բայց եկան Հայաստան: 2003թ. Հովհաննիսյանը ձեր հետ պայքարում է եւ շարունակելու է պայքարել: Նա ձեր կողմից ժամանակին ընտրված նախագահն է»:
Կարդացեք նաև
Լուիզա ՍՈՒՔԻԱՍՅԱՆ
