Երեւանի փոխոստիկանապետ Վալերի Օսիպյանն այս պահին Մաշտոցի պողոտայով ընթացող բողոքի երթի մասնակիցների այն դժգոհություններին, որ ոստիկանների հրմշտոցի ժամանակ մի կին է ուշաթափվել, ասաց, որ տեղյակ չէ: Ականատեսներից մեկը սկսեց Օսիպյանին պատմել, թե ինչ է տեղի ունեցել. «Լաուրա, եթե չեմ սխալվում, Զաքարյան: Ես նրա կողքին կանգնած էի, երբ ընկավ, ոստիկանները շարունակում էին հրել, ու նրա վրա մի քանի մարդ ընկավ, ուսը կոտրվեց: Տեղեկացրին, որ շտապօգնության մեքենայով տեղափոխեցին հիվանդանոց»:
Օսիպյանն էլ երթի մասնակիցներին տեղեկացրեց, որ այդ կնոջն, այո, տեղափոխում են հիվանդանոց, ու նա ասել է, որ ուղղակի ուսի հատվածում ցավ է զգացել.«Թե հետագայում ինչ կլինի, չեմ կարող ասել»:
Այս պահին երթը շարժվում է դեպի կառավարության շենք: Հիշեցնենք, որ Ազատության հրապարակից օրերս մահացած Արթուր Սարգսյանի՝ Հաց բերողի մահվան համար մեղավորներին պատժելու պահանջով Ազատության հրապարակից բողոքի ցույցից հետո մասնակիցները երթ սկսեցին:
Նրանք պահանջում են արդարադատության նախարարի եւ գլխավոր դատախազի հրաժարականը, ինչպես նաեւ ՀՀ նախագահ Սերժ Սարգսյանի հրաժարականը: Ինչպես նաեւ, նրանք պահանջում են քրեական գործ հարուցել դատավոր Մկրտչյանի եւ Էդ. Հակոբյանի նկատմամբ:
Կարդացեք նաև
Նելլի ԲԱԲԱՅԱՆ
