Հայաստանի բնակչության մեծամասնությունն, ինչպես գիտենք, կանայք են: Ըստ վերջին հաշվարկների` կանայք կազմում են ընդհանուր բնակչության շուրջ 60 տոկոսը, եւ եթե նրանց 80 տոկոսն էլ համակրում է վարչապետին եւ խորհրդարանական ընտրությունների հարցում, կողմնորոշված է, ստացվում է, որ ՀՀԿ-ն գալիք խորհրդարանական ընտրություններում, միայն վարչապետ-հայաստանցի կանայք փոխհարաբերակցությունից ստանալու է շուրջ 40 տոկոս ձայն:
Բայց սա դեռ բացարձակ մեծամասնություն չէ: Դրա համար առաջարկում եմ ՀՀԿ-ի քարոզարշավին մասնակից դարձնել ոչ միայն Կարեն Կարապետյանին, որն, ի դեպ, ՀՀԿ-ի ցուցակում չկա, չնայած ՀՀԿ-ի բոլոր քարոզչական պաստառներում ու նյութերում կա, այլ նաեւ արդարադատության նախարար` ցուցակի առաջին կին Արփինե Հովհաննիսյանին: Ամենայն հավանականությամբ տիկին նախարարին էլ, օրինակ` Էրեբունիում կամ, որն ավելի հավանական է` Նուբարաշենում (արդարադատության նախարարության քրեակատարողական հիմնարկի մոտ), կմոտենա մի տղամարդ ու կասի, որ Հայաստանի տղամարդկանց 80 տոկոսը համակրում է Արփինե Հովհաննիսյանին: Մյուս քսան տոկոսն էլ, ի դեպ կանանց քսան տոկոսի հետ միասին արտագաղթել են, թե չէ, եթե այստեղ լինեին, անպայման եւ մեծ հաճույքով կհամակրեին, կանայքՙ Կարապետյանին, տղամարդիկ` Հովհաննիսյանին:
Թե ինչի՞, ավելի ճիշտ` ո՞ւմ վրա են ընտրությունների մասնակից մյուս կուսակցություններն ու դաշինքները իրենց հույսը դրել, դժվարանում եմ ասել: Ամեն դեպքում, քանի դեռ տիկին Հովհաննիսյանը քարոզարշավին ակտիվ չի մասնակցում, ընտրողների հետ հանդիպումների չի գնում, մյուս կուսակցությունները հայաստանցի տղամարդկանց ձայները ստանալու հույսեր կարող են ունենալ, բայց այստեղ արդեն կարող է միջամտել Սերժ Սարգսյանը, որը չնայած ՀՀԿ-ի ցուցակում չկա, բայց, ինչպես հայտնի է նախորդ ընտրություններից, որքան ուզում` խփում է, նկատի ունեմ տոկոս: Գուցե այս պատճառով էլ տիկին նախարարին չեն ներքաշում նախընտրական թուհուբոհի մեջ. մնում են տղամարդ ընտրողները, իսկ տղամարդկանց կարելի է եւ խփել, ներքին զորքերի հրամանատար գեներալ Լեւոն Երանոսյանի ականջից եւ ծննդավայր` Ջրառատ գյուղից (Արմավիրի մարզ) հեռու, ցանկալի է առանց նրա գործուն միջամտության:
Հ. ԱՖՅԱՆ
Կարդացեք նաև
Հոդվածն ամբողջությամբ կարող եք կարդալ «Ազգ» թերթի այս համարում
