«Այս ընտրությունները սկզբունքային նշանակություն ունեն»,-Էրեբունիում ընտրողների հետ հանդիպմանը հայտարարեց ՀՅԴ Գերագույն մարմնի անդամ, ՀՀ բնապահպանության նախարար Արծվիկ Մինասյանը:
Մանկապատանեկան ստեղծագործական կենտրոն ՀՈԱԿ-ի դահլիճում պարոն Մինասյանը պարզաբանեց. «Սահմանադրական բարեփոխումներից հետո Հայաստանն այլևս կառավարման խորհրդարանական եղանակի է անցել, ինչը նշանակում է, որ երկրի բարձրագույն և միակ իշխանությունը, որ ձևավորելու է օրենսդիր, գործադիր և դատական մարմինները, մնում է խորհրդարանը»:
Արծվիկ Մինասյանի համոզմամբ` հետևաբար, ԱԺ-ում պետք է ներկայացված լինեն ուժեղ քաղաքական միավորներ, որոնք ունեն հստակ գաղափարախոսություն, ծրագրեր և դրանք իրականացնող կայուն ու հետևողական անձինք: Անդրադառնալով ՀՅԴ նախընտրական ծրագրին` պարոն Մինասյանը շեշտեց, թե այն ունի երեք հիմնասյուներ` ստեղծել կայուն զարգացում, անվտանգ երկիր և համերաշխ ու արդար Հայաստան.
«Այս երեք հենասյուները փոխկապված են իրար և մեկն առանց մյուսի գոյություն ունենալ չի կարող: Մեզ համար կայուն զարգացումը ոչ միայն տնտեսական աճն է, այլև դրանց որակական կողմը, որն առաջին հերթին պետք է ապահովի յուրաքանչյուր քաղաքացու բարեկեցության աճ, իրավունքների իրականացման հավասար հնարավորություններ, ոչ թե միայն լոզունգային և թղթի վրա գրված»:
Կարդացեք նաև
Արծվիկ Մինասյանը բարձրաձայնեց այնպիսի արատավոր երևույթների մասին, ինչպիսիք են խոշոր նպատակի և ձգտման հասած ձեռնարկությունները, որոնք աղտոտում են ամեն ինչ, և նրանց ստեղծած տնտեսական արժեքը բաշխվում է մեկ կամ մի խումբ անձանց միջև:
Արծվիկ Մինասյանը շեշտեց, թե ՀՀ բնական ռեսուրսները ՀՀ յուրաքանչյուր քաղաքացու հարստությունն է, հետևաբար դրանցից ստացվող օգուտը պետք է հավասարաչափ բաշխվի բոլորի միջև:
Դաշնակցության համար սկզբունքային հարց է դառնում թե՛ սահմանների անվտանգության ապահովումը հենց սահմանին, թե՛ երկրի ներսում անվտանգության համակարգի ձևավորումը:
Տաթև ՀԱՐՈՒԹՅՈՒՆՅԱՆ
