Ի հիշատակ Արթուր Սարգսյանի` «Հաց բերողի», կազմակերպված երթի մասնակիցները որոշեցին այսօրվանից նստացույց անել Ազատության հրապարակում: Նրանք ցանկանում էին մոտենալ ՀՀ արդարադատության նախարարության շենքին իրենց բողոքի ձայնը բարձրացնելու և հաց դնելու նախարարության շենքի առաջ, սակայն Երևանի փոխոստիկանապետ Վալերի Օսիպյանը նրանց թույլ չէր տալիս:
Ինչպես տեղեկացրել ենք, քաղաքացիները` Շահեն Հարությունյանի գլխավորությամբ Ազատության հրապարակից հիշատակի երթ անցկացրին Մաշտոցի պողոտայով, հետո կոչով հանդես եկան ՀՀ դատախազության առաջ: Այնուհետև ցանկանում էին մոտենալ Արդարադատության նախարարության շենքին, սակայն ոստիկանները նրանց խոչընդոտում էին: Շահեն Հարությունյանը մի քանի անգամ հայտարարեց. «Մեր կռիվը ոստիկանների դեմ չէ»:
Պարոն Օսիպյանն առաջարկում էր հինգ հոգանոց խումբ կազմել, նոր մոտենալ նախարարության շենքին` նշելով, թե երթի մասնակիցների նպատակը իրականում բախումներ հրահրելն է, սակայն քաղաքացիները չէին համաձայնում. ուզում են, որ յուրաքանչյուրն իր բողոքն արտահայտելու հնարավորություն ունենա: Շանթ Հարությունյանի կինը` Ռուզաննա Բադալյանը հայտարարեց.
Կարդացեք նաև
«Շահենի մայրը լինելուց բացի ես քաղաքացի եմ և ուզում եմ իմ կարծիքը հայտնել: Պարոն Օսիպյան, խնդրում եմ թույլ տալ, որ խաղաղ մոտենանք արդարադատության նախարարության շենքին»: Շահեն Հարությունյանը հորդորեց չխոչընդոտել իրենց` ազատ տեղաշարժի իրավունքը: Օսիպյանն արձագանքեց. «Ինչքան որ դուք ունեք սահմանադրությամբ ամրագրված իրավունքներ, նաև պարտավորություններ, նաև մյուս քաղաքացիներն ունեն ազատ տեղաշարժի իրավունք, որոնց տեղաշարժն այժմ սահմանափակում եք»:
Պարոն Օսիպյանը, դիմելով երթի մասնակիցներից մեկին, ասաց. «Տիկին, Դուք իմ ձեռքերը ճանկռել եք» ու նշեց, թե հիշատակն այդպես չեն հարգում: Նաև զգուշացրեց, որ այլևս, ինչպես մինչև այժմ էր, չեն հանդուրժելու օրինախախտներին: Տիկին Ռուզաննան ասաց, որ իրենք բոլորն ուզում են սև ժապավենով հացը դնել Արդարադատության նախարարության շենքի առաջ և չեն ընդունում հինգ հոգով գնալու առաջարկը: Մասնակիցներից մեկն էլ դիմեց Օսիպյանին. «Ավտոմատով չենք, հացով ենք»:
Շահենը վրդովվեց, թե այսքանից հետո, որ չեն էլ կարողանում անգամ իրենց բողոքի ձայնը բարձրացնել, հետևաբար ի՞նչ սրտով տուն գնան: Նա հայտարարեց, թե շարժվում են դեպի ՌԴ դեսպանատուն, քանի որ այսօր ինքն ու Արթուր Սարգսյանը Ազատության հրապարակում հայտարարելու էին, որ ստորագրահավաք են սկսում ընդդեմ ՌԴ-ի, և Արթուր Սարգսյանն առաջարկելու էր ապրիլի 1-4-ը ռուսական դրոշներն իջեցնել, քանի որ ապրիլյան պատերազմի զոհերն իրենց զենքով են եղել:
Ի վերջո, ոստիկանները երթի մասնակիցներին ուղեկցեցին մինչև Վազգեն Սարգսյան փողոց: Նշենք, որ երթի մասնակիցները որոշեցին այսօրվանից նստացույց սկսել Ազատության հրապարակում, վաղն էլ ժամը 18.00-ին` երթ Ազատության հրապարակից:
Տաթև ՀԱՐՈՒԹՅՈՒՆՅԱՆ
